Túrkistan oblysy Keles aýdanyndaǵy balabaqsha búldirshinderi jappaı ýlanyp, aýrýhanaǵa tústi. 2-3 jas aralyǵyndaǵy balalar bastary aınalyp, birinen soń biri qusyp, dene qyzýy kóterilgen soń qyzmetkerler jedel járdem shaqyrǵan. Aýrýhanaǵa jetkizilgen balalardyń on besi alǵashqy kómek kórsetilgen soń, úıge qaıtarylǵan. Al 19 balanyń úsheýi jansaqtaý bólimine, 16 búldirshin juqpaly aýrýlar bólimshesine jatqyzylǵan, dep habarlaıdy Egemen.kz.
- Búginnen bastap naýqastardyń jaǵdaıy qalypty bolýyna baılanysty úılerine shyǵara bastadyq. Qazirgi tańda aýrýhanada jatqany úsh naýqas jatyr, ınfeksııada úsh naýqas jatyr. Qalǵan úsh naýastyń jaǵdaıy birqalypty. Emin alyp jatyr, - dedi Otyrar.kz-ke Keles aýdandyq aýrýhanasy bas dárigeriniń orynbasary Bekarys Asqarbekuly.
Qazir sanıtarlyq epıdemologııa mamandary zerthanalyq tekserý júrgizip jatyr. Oqıǵaǵa qatysty oblystyq polısııa departamenti qylmystyq kodekstiń 304-baby boıynsha is qozǵady. Saraptama taǵaıyndaldy.
- Atalǵan fakti boıynsha polısııamen "Sanıtarlyq erejelerdi nemese gıgıenalyq normatıvterdi buzý" baby boıynsha qylmystyq is qozǵaldy. Qazirgi ýaqytta saraptama taǵaıyndaldy jáne barlyq jaǵdaılar anyqtalýda. Tergeý nátıjeleri boıynsha zańdy sheshim qabyldanady, - dep málimdedi Túrkistan oblysy polısııa departamentiniń baspasóz qyzmeti.
Keles aýdanyndaǵy jeke balabaqshada bolǵan jappaı ýlaný jaǵdaıyna qatysty aýdandyq sanıtarııalyq-epıdemıologııalyq basqarmasy málimdeme jasady. Qazir synamalar alynyp, zertteý júrgizilip jatyr. Mamandar aldyn ala boljam boıynsha tańǵy asqa berilgen kúrish botqasynan kúdiktenip otyr.
- Synamalar taǵam ónimderinen alyndy, sýlarynan alyndy. Naýqastardan qusyq jáne asqazan shaıyndylary, nysandardan súrtindiler alyndy. Aldyn ala zerdeleý jumystarynyń nátıjesinde kúrish botqasynan bolýy múmkin degen kúdik bar. Tańǵy asqa kúrish botqasy berilgen. Qazir kúrish botqasynan synamalar alynyp, zertteý jumystary júrgizilip jatyr, - dedi Keles aýdandyq sanıtarııalyq-epıdemıologııalyq basqarmasynyń basshysy Nursultan Saparǵalıuly.