BAQ ókilderine – zor qurmet

Aıtýly kúnde respýblıkanyń túkpir-túkpirinen kelgen BAQ salasynyń qyzmetkerleri Ortalyq kommýnıkasııa­lar qyzmeti alańyna jınaldy. Alys-jaqynnan jetken jýrnalıster arqa-jarqa qaýyshyp, amandasyp jatty. Memlekettik nagradalardy Prezıdent keńesshisi – Prezıdenttiń baspasóz hatshysy Berik Ýálı men Mádenıet jáne aqparat mınıstri Aıda Balaeva tabystady.

– Osydan 5 jyl buryn Memleket basshysy Úkimetke tapsyrma berip, Buqara­lyq aqparat quraldary qyzmet­ker­leriniń arnaıy merekesin bekitken edi. Sodan beri BAQ qyzmetker­leri kúni 28 maýsymǵa belgilenip, óziniń laıyq­ty ornyn aldy. Prezıdent únemi BAQ-ta shyqqan materıaldarǵa nazar aýdaryp, gazetterdi oqyp, teledıdardy kórip, saıttarǵa kóz júgirtip otyrady. Barlyǵyn nazarda ustaıdy, arnaıy tapsyrmalar berip, sheshý joldaryn kórsetedi. Sol sebepti sizderdiń qoǵam­daǵy oryndaryńyz óte zor. Shyn mánin­de «Tórtinshi bılik» atyna laıyq eken­derińizdi dáleldep júrsizder. Memleket basshysynyń reformalaryn jan-jaq­ty halyqqa jetkizýde BAQ úlken ról atqaryp otyr, – dedi Berik Ýálı.

Onyń aıtýynsha, bıylǵy mereke­niń basty ereksheligi – memlekettik nagradalardyń deni óńirlerde, naǵyz aqparat alańynda júrgen áriptesterge berilip jatyr. Mınıstr Aıda Balaeva jýrnalıster qaýymyn tól merekesimen quttyqtady.

– BAQ ókilderi – qoǵam men bılik arasyndaǵy altyn kópir. Sondyqtan osy memlekette turatyn árbir azamat sizderdiń jumystaryńyzdy baǵalaıdy. О́ıtkeni sizder arqyly qoǵamnyń kóptegen ózekti máseleleri aıtylady jáne bul memlekettik organdardyń jumysyn jandandyryp, jetildirýge yqpal etedi. Sondyqtan osy mańyzdy eńbekterińizge shyǵarmashylyq tabys tileımin. Árqashan elimizde jaqsy jańalyqtar kóp bolsyn. Sizderdiń denderińizge saýlyq, otbasylaryńyzǵa amandyq tileımin, – dedi A.Balaeva.

Qurmet aldymen jýrnalıstıka salasynyń damýyna súbeli úles qosqan maıtalmandarǵa kórsetildi. «Qazaq­stannyń eńbek sińirgen qaıratkeri» ataǵy jýrnalıstıka zertteýshisi, ǵalym, ardager jýrnalıst Qudaıbergen Tursynǵa, jazýshy, pýblısıst, ardager jýrna­lıst Sádibek Túgelge, jýrnalıstıka arda­geri Maqsat Tájimuratovqa, Ál-Farabı atyndaǵy Qazaq ulttyq ýnıversı­teti jýrnalıstıka fakýltetiniń aǵa oqytýshysy Ermahan Ábdiramanǵa berildi.

«Qurmet» ordeni «Ońtústik Qazaqstan» gazetiniń bas redaktory Abaı Balajanǵa, Atyraý oblystyq «Prıkaspııskaıa kommýna» qoǵamdyq-saıası gazetiniń sholýshysy Svetlana Novakqa, L.N.Gýmılev atyndaǵy Eýrazııa ulttyq ýnıversıteti Baspasóz jáne baspa isi kafedrasynyń professory Muratbek Toqtaǵazınge, «Qazaqstan» RTRK AQ bas rejısseri Qarlyǵash Smaǵulovaǵa, «Habar agenttigi» AQ ardager teleoperatory Aǵabek Qazanbaıǵa tabystaldy.

«Eren eńbegi úshin» medalin «Ontustik» telearnasy dırektorynyń orynbasary – bas redaktory Gúlsara Qýanyshbaeva, «Habar» jáne «24kz» telearnalary Baǵdarlamalaý jáne efır taratý bóliminiń shef-redaktory Andreı Tarakov, «El Arna» telearnasynyń rejısseri Ásel Igisinova, «Qazaqstan», «Aqmola» telearnalarynyń burynǵy bas dırektory, belgili jýrnalıst Erlan Atambaı, «Qazcontent» AQ «Baq.kz» aqparattyq agenttiginiń aǵa shyǵarýshy redaktory Samal Almanova, «Habar» telearnasynyń shyǵarýshy redaktory Bolat Kákibalanov, «Habar agenttigi» AQ «El Arna» telearnasynyń aǵa rejıs­seri Baıan Arystanova, «Habar» telearnasy­nyń jańalyqtar bóliminiń basshysy Rýslan Ospan, «Habar» telearnasynyń jańalyqtar bóliminiń aǵa rejısseri Quralaı Jumaǵulova, «Almaty» telearnasy bas dırektorynyń orynbasary Ilzat Akchýrın, «Evrazııa» telearnasynyń shef-korrespondenti Svetlana Penkova, «24kz» telearnasynyń shyǵarýshy redaktory Erbol Bekbaev ıelendi. «Abay Live» ıýtýb-arnasynyń júrgizýshisi Abaı Tilenshıevke «Shapaǵat» medali buıyrdy.

Birqatar azamat Memleket basshysy Qasym-Jomart Toqaevtyń arnaıy Alǵyshatymen marapattaldy. Mereıi ústem bolǵandardyń qatarynda Prezıdent Is basqarýshysy orynbasarynyń kómekshisi Gúljan Baıtanaeva, bloger Almas Shoraev, «Qazaqstan» ulttyq telearnasy rejısserler bóliminiń bas rejısseri Mármar Orazbaeva, «Halyq úni» aqparattyq agenttiginiń tilshisi Dáýren Erbolatov, «Informburo.kz» jelilik basylymynyń tilshisi Aıgerim Ýmmat, «Astana qalasy kommýnıkasııa qyzmeti» MKK basshysy Abzal Dosyman, «Astana» telearnasy Baǵdarlamalar jáne anonstar daıyndaý qyzmetiniń jetekshisi Dastan Sapashev bar.

Saltanatty is-sharada otandyq BAQ-tyń qalyptasýyna atsalysqan ardager jýrnalıst Tursynhan Tolqynbaıulyna, qalamdy qarý etken jýrnalıstermen qatar, tájirıbeli mamandar «ERA» telekompanııasy» JShS bas esepshisi Klara Tursynbaevaǵa jáne «Egemen Qazaqstan» gazetiniń elektrondyq baılanys operatory Lázzat Nurpeıisovaǵa «Eńbek ardageri» medali tapsyryldy.

– «Egemen Qazaqstan» gazetine alǵash osydan 22 jyl buryn, 39 jasymda aıaq bastym. Buqaralyq aqparat quraldary qyzmetkerlerimen bite qaınasa, tabandy jumys istep kelemiz. Jahandaný dáýirinde maǵynaly ári mazmundy maqala­lar arqyly ulttyń rýhyn asqaq­tatyp, buqaraǵa eldik murattardy dárip­tep, birlik pen berekeni nasıhattaýda atsalysyp júrgen áriptesterimdi tól merekesimen quttyqtaımyn, – dedi Lázzat Nurpeıisova.

«Aqparat salasynyń úzdigi» tósbelgi­sin «Qazaqstan» RTRK AQ Dıjıtal departamentiniń ınternet-redaksııa jetekshisi Jánııa Orasheva, «Qazsport» telear­nasynyń baǵdarlamalyq qyzmeti­niń baǵdarlamalar dırektory Shyryn Súleımenova, «Habar agenttigi» AQ «24kz» telearnasynyń dırektory Jasyn Birkenov, «Habar agenttigi» AQ О́ndiristik ortalyǵy beınemontajdaý bóliminiń montajdaý ınjeneri Dýlat Entebekov, «Eýrazııa+ORT» JShS aqparattyq-saraptamalyq jáne qoǵamdyq-saıası baǵdarlamalar dıreksııasynyń tilshisi Gúlnázııa Zarıpova, «Astana qalasy teledıdary» JShS baǵdarlama dırektory Ásel Núkisheva, «Qazcontent» AQ «El.kz» aqparattyq agenttiginiń bas redaktorynyń orynbasary Rústem Omarov, «Kazahstanskaıa pravda» gazetiniń bet qattaý operatory Olga Draka, Taldaý jáne aqparat ortalyǵy Respýblıkalyq BAQ monıtorıngi basqarmasynyń basshysy Erqanat Myrzahmetov, «Qazmedıa ortalyǵy» basqarýshy kompanııasy» JShS Aqparattyq-stýdııalyq kesheniniń paıdalaný bóliminiń jetekshi ınjeneri Arman Qarkenov aldy.

Sondaı-aq jýrnalısterdiń kásibı merekesine oraı, Prezıdent Qasym-Jomart Toqaevtyń atynan birqatar buqaralyq aqparat quraldary qyzmet­kerine páter kilti tabystaldy.

«Dara» prezıdenttik bastamalar qorynyń uıymdastyrýymen ótken is-sharada mass-medıa salasynyń qyzmet­kerlerine páter sertıfıkattaryn Prezıdent keńesshisi – Baspasóz hatshysy Berik Ýálı, Mádenıet jáne aqparat mınıstri Aıda Balaeva jáne «Dara» qorynyń prezıdenti Ásel Shildebaeva saltanatty túrde tabys etti.

Berik Ýálı Memleket basshysynyń BAQ salasyn damytýǵa aıryqsha mán be­retinin aıta kelip, qýanysh ıelerin jańa qonysymen quttyqtady. «Prezıdenttiń tapsyrmasymen jyl saıyn jýrnalıs­terge baspana berý dástúrge aınaldy. Eń bastysy, páter kiltteri elimizdiń damýyna, Memleket basshysy júrgizip otyr­ǵan reformalardy halyqqa jet­kizýge eleýli úles qosyp kele jatqan BAQ ókilderine tapsyryldy. Sonyń ishinde baspana shyn máninde muqtaj jandarǵa berilip otyr. Atap aıtqanda, 21 páter kópbalaly otbasyna, 5 páter jalǵyzbasty analarǵa berildi. Sonymen qatar otbasyn­da múm­kindigi shekteýli balasy nemese ju­baıy bar 11 azamat bas­panaly boldy. Páter alǵan BAQ salasy qyzmetkerleriniń ara­synda 6 otbasy osy ýaqytqa deıin jataq­hana­da turyp kelgen. Bul ıgi dástúr aldaǵy ýaqyt­ta da jalǵasyn tabady. Bir otbasy baspanaly bolsa, qýanyp, halyqtan súıinshi suraıtyn jýrnalısterdiń úıli bolýy – óte qýanyshty jaǵdaı», dedi Berik Ýálı.

Mádenıet jáne aqparat mınıstri Aıda Balaeva memleket áleýmettik jobalardy tolyǵymen qoldaıtynyn atap ótti. «Memleket basshysy turǵyn úı máse­lesine kóp kóńil bóledi. Qoljetimdi bas­pana boıynsha túrli áleýmettik jobalardan basqa, Qazaqstannyń bir mıllıon úsh júz myńnan astam azamaty turǵyn úı jaǵdaıyn jaqsartý úshin, jalpy úsh trıllıon teńgeden astam zeınetaqy jınaǵyn paıdalanǵanyn da atap ótken jón. Bul memlekettiń óz azamattaryna jerdem berýiniń teńdessiz tetigi», dedi mınıstr.

Byltyr Memleket basshysynyń atynan BAQ qyzmetkerlerine 1 jáne 2 bólmeli 65 páter berilgen bolsa, bıyl 67 páter úlestirildi. Onyń ishinde 13 baspana 3 bólmeli, 45-i – eki bólmeli, 9-y – bir bólmeli páterler.

Kásibı mereke kúni qýanyshqa kenelgen mass-medıa ókilderi arasynda gazetimizdiń de 6 qyzmetkeri bar. Olar –  jýrnalıster Abaı Aımaǵambet, Batyr­han Sársenhan, Jánibek Álıman, dızaı­ner Záýresh Nuǵymanova, «Egemen.kz» ınter­net-basylym jetekshisi Dınar Kerim, redaksııa qyzmetkeri Baqytjamal Qaıypjanova.