Búgin Prezıdent Qasym-Jomart Toqaev oıyn bıznesi máselesine qatysty zańǵa qol qoıdy. Osy oraıda senator Janna Asanova áleýmettik jelidegi paraqshasynda pikir bildirdi, dep habarlaıdy Egemen.kz.
Atyraýda ótken Ulttyq quryltaıdyń úshinshi otyrysynda Memleket basshysy lýdomanııamen kúres boıynsha júıeli jumysty jolǵa qoıyp, keshendi jospar quryp, tıisti zań qabyldaýdy jedeldetýdi tapsyrǵan edi.
Bıyl maýsym aıynda Parlament oıyn bıznesi, lotereıa jáne lotereıa qyzmeti máseleleri boıynsha, onyń ishinde Ákimshilik quqyq buzýshylyq týraly kodekske zańnamalyq túzetýler qabyldady. Zańdar 100-den astam túzetýlerdi qamtıdy. Depýtat birneshe normany atady.
«1. Azamattyń qumar oıyndarǵa qatysýyn 1 jastan 10 jasqa deıin óz betinshe shekteý quqyǵy belgilengen, tyıym salýdy merziminen buryn toqtatý múmkin emes. 2. Boryshkerlerdiń biryńǵaı tizilimine engizilgen jeke tulǵalar úshin qumar oıyndar men bás tigýge qatysýǵa tyıym salý belgilendi (shara býkmekerlik keńselerdiń áleýetti klıentteriniń sanyn azaıtýǵa baǵyttalǵan). 3. Joǵaryda atalǵan tulǵalardy qumar oıyndar men bás tigýge tartqany jáne jibergeni úshin zańdy tulǵalardyń ákimshilik jaýaptylyǵy engiziledi. 4. Memlekettik qyzmetkerlerge kez kelgen qumar oıyndarda – býkmekerlik keńselerde, kazınolarda jáne onlaın-kazınolarda shekteý qoıylady. Dálirek aıtqanda, jalpy sany 280 myń adamdy quraıtyn áskerı qyzmetshiler, memlekettik organdardyń qyzmetkerleri, bıýdjettik uıymdardyń basshylary qumar oıyn oınaı almaıdy», dep jazdy depýtat.
Depýtat atap ótkendeı, atalǵan zań buzylǵan jaǵdaıda tıisti sharalar qoldanylatyn bolady.
«Oıyn bıznesin uıymdastyrýshylar úshin qumar oıyndar men bás tigýge qatysý táýekelderi men zııany týraly eskertýdi oıyn mekemelerinde jáne jeke ınternet-resýrstarda ornalastyrý mindeti engiziledi. Oıyn mekemeleri, býkmekerlik keńseler men totalızatorlar jumysynyń jańa úlgilik erejeleri qabyldanady. Erejelerde kazıno klıentteri men býkmekerlerdiń múddelerin qorǵaıtyn normalar da kózdelgen. Zańda qumar oıyndarǵa táýeldi adamdardy medısınalyq ońaltý tártibi belgilengen (oıynshylardy dınamıkalyq esepke qoımaı, medısınalyq qupııany saqtaı otyryp konsýltatıvtik baqylaý). 21 jasqa tolmaǵan adamdarǵa energetıkalyq sýsyndardy satýǵa tyıym salynady. Baılanys operatorlaryna qumar oıyndar men bás tigý jarnamasy bar habarlamalardy taratýǵa tyıym salynady. Býkmeker keńsesi ornalasqan jerde, sport ǵımarattarynyń ishinde jáne sportshylardyń kıimderinde ornalastyrylǵandardy qospaǵanda, ǵımarattarda, kólik quraldarynda býkmeker keńseleri men totalızatorlardy syrtqy jarnamalaýǵa tyıym salynady. Sporttyq taqyryptaǵy BAQ-taǵy jarnamany qospaǵanda, sondaı-aq otandyq telearnalar halyqaralyq sport jarystaryn tikeleı translıasııalaý kezinde buqaralyq aqparat quraldarynda, kıno, beıne jáne anyqtamalyq qyzmet kórsetýde býkmekerlik keńseler men totalızatorlardy jarnamalaýǵa tyıym salynady. Býkmeker keńseleriniń jarnamasy taratylǵan jaǵdaıda 60 AEK jáne odan joǵary aıyppul qarastyrylǵan. Týrızm jáne sport mınıstrliginiń sheteldik býkmekerlik keńselerdiń, lısenzııasy joq totalızatorlardyń jáne ınternet-kazınolardyń tizimin júrgizý jónindegi quzyreti, sondaı-aq bankter men tólem uıymdaryna olardyń paıdasyna qarjylyq operasııalar júrgizýge tyıym salý belgilenedi. Budan basqa, endi ınternet-kazıno uıymdastyrýshylary eki jylǵa deıin bas bostandyǵynan aıyrýmen qylmystyq jaýapkershilikke tartylady. Elektrondyq lotereıa bıletteri endi tek qana resmı ınternet-resýrs nemese lotereıa operatorynyń mobıldik qosymshasy arqyly satylady. Osylaısha, «Lotomatic» termınaldary men lotoklýbtardyń qyzmetine tyıym salynady. Lotereıa bıletterin turǵyn úılerde, jataqhanalarda, bilim berý, densaýlyq saqtaý uıymdarynda, ǵıbadat úıleri men ǵımarattarynda, sondaı-aq bilim berý jáne densaýlyq saqtaý uıymdarynan júz metr radıýsta taratýǵa tyıym salynady. Atalǵan sharalar kóshelerde lotereıa ónimderiniń naqty qatysýyn birneshe ese qysqartady. Kóshelerde tek klassıkalyq lotereıany satatyn núkteler ǵana qalady», dep pikir qaldyrdy Senat depýtaty.
Janna Asanovanyń jazýynsha, Úkimet oıyn bıznesi, lotereıa jáne lotereıa qyzmeti máseleleri jónindegi zańnyń negizgi erejelerimen tolyq úılestirilgen 2024-2026 jyldarǵa arnalǵan zańsyz oıyn bıznesine qarsy is-qımyl jónindegi keshendi jospardy qabyldady.