Memlekettik qyzmet isteri agenttiginde agenttik tóraǵasy Darhan Jazyqbaıdyń basshylyǵymen servıstik memlekettik apparatty qalyptastyrý jáne onyń qyzmetin bıýrokratııadan aryltý máseleleri jónindegi Konsýltatıvtik-saraptamalyq toptyń kezekti otyrysy ótti, dep habarlaıdy Egemen.kz.
Otyrysqa Konsýltatıvtik-saraptamalyq toptyń músheleri E. L. Ýstemırov, O. A. Hýdaıbergenov, R. V. Konıashkın, Prezıdent Ákimshiliginiń, Úkimet Apparatynyń, Sıfrlyq damý, ınnovasııalar jáne aeroǵarysh ónerkásibi mınıstrliginiń laýazymdy tulǵalary, «Azamattarǵa arnalǵan úkimet «memlekettik korporasııasy» KEAQ, «UAT» AQ, Sıfrlyq úkimetti qoldaý ortalyǵynyń ókilderi, úkimettik emes uıymdardyń ókilderi B.G. Nurǵazıeva, B.Sh. Aǵybaeva, sondaı-aq ortalyq memlekettik jáne jergilikti atqarýshy organdar beınekonferensbaılanys arqyly qatysty.
Kún tártibinde memlekettik qyzmetter kórsetý salasyndaǵy zańnamany jetildirý boıynsha jańa tásilder jáne memlekettik kórsetiletin qyzmetterdi usyný rásimderin jetildirý aıasyndaǵy 17 baǵyt boıynsha júrgizilgen taldaý qorytyndylary qaraldy.
MQIA Tóraǵasy Darhan Jazyqbaı Qazaqstan Respýblıkasynda memlekettik basqarýdy damytýdyń 2030 jylǵa deıingi tujyrymdamasyna memlekettik basqarýdyń servıstik jáne «adamǵa baǵdarlanǵan» modelin qalyptastyrý negizgi talap retinde aıqyndalǵanyn, osyǵan sáıkes azamattar men olardyń ál-aýqaty basty qundylyq sanalatynyn aıtty.
«Memlekettik qyzmet kórsetý úderisterin únemi jetildirý bizdiń jumysymyzdaǵy negizgi ustanymdardyń biri. Bul jumysty oryndaý kezinde jeke múddeden góri qyzmetti alýshylardyń múddeleri men zańdy quqyqtary basty orynda turýy qajet», dep atap ótti Darhan Jazyqbaı.
Bıyl «Memlekettik kórsetiletin qyzmetter týraly» zańnyń qabyldanǵanyna 11 jyl tolyp otyr. Onyń jekelegen normalarynyń jetkilikti ýaqyt synaqtan ótkenin jáne quqyq qoldaný tájirıbesi qalyptasqanyn eskere kele, erejelerdi qaıta qaraý, jańa quqyqtyq ınstıtýttardy engizý qajettigi týyndaǵanyn atap ótý kerek.
Qoǵam talaptary men qajettilikterine jaýap beretin servıstik memleketti qalyptastyrý maqsatynda Agenttik memlekettik qyzmetterdi kórsetýdiń proaktıvti, kompozıttik, eksaýmaqtyq tásilderin zańnamalyq deńgeıde belgileýdi usynady.
Máselen, memlekettik qyzmetterdi kórsetýdiń proaktıvti tásili engizilgen kezde qyzmet kórsetýshi memlekettik organdar azamattarǵa olar ótinish bermeı-aq memlekettik qyzmetterdi kórsetýge usynys jasaıtyn bolady, al kompozıttik ádis «bir ótinish» negizinde ózara baılanysty birneshe memlekettik qyzmetterdi alýǵa múmkindik beredi.
Budan basqa, azamattardyń memlekettik qyzmetterdi alý rásimderin jeńildetetin «formaldi sebepterge baılanysty bas tartýǵa jol bermeý», «ozyńqy ótinishter júıesine» kóshý sııaqty jańa quqyqtyq ınstıtýttardy engizý usynyldy.
Mysaly, «formaldi sebepterge baılanysty bas tartýǵa jol bermeý» azamattarǵa qujatty qajet jaǵdaıda túzetý arqyly bas tartýsyz alýǵa múmkindik beredi, al «ozyńqy ótinishter júıesi» azamattarǵa memlekettik qyzmettiń qoljetimdiligi qamtamasyz etilgenge deıin «kútý paraǵynda» bolýǵa múmkindik beredi.
Sondaı-aq otyrystyń kún tártibindegi máselelerdi qaraý barysynda agenttik ókilderi memlekettik qyzmet kórsetý prosesine tıisti qorytyndy nemese kelisim beretin ózge de memlekettik organdar men uıymdar qatysa alatynyna nazar aýdardy. Osyǵan baılanysty olar úshin memlekettik qyzmetter kórsetý boıynsha quqyqtar men mindetterdi aıqyndaý, olardy kelisý merzimderi men tártibin belgileý usynyldy, bul olardyń jaýapkershiligin arttyrady.
Otyrysta sondaı-aq memlekettik qyzmetter kórsetý úderisterin keshendi taldaý nátıjeleri jáne onyń qorytyndysy boıynsha ázirlengen, ıaǵnı osy úderisterdi jaqsartýǵa baǵyttalǵan júıeli usynystar qaraldy.
Buǵan deıin, Premer-mınıstrdiń tapsyrmasy boıynsha Memlekettik qyzmet isteri agenttigi Sıfrlyq damý, ınnovasııalar jáne aeroǵarysh ónerkásibi mınıstrligimen birlesip, «Azamattarǵa arnalǵan úkimet» memlekettik korporasııasynyń, «Ulttyq aqparattyq tehnologııalar» AQ jáne 29 ortalyq organ ókilderiniń qatysýymen Tizilimge engizilgen barlyq memlekettik kórsetiletin qyzmetter boıynsha tyńdaýlar uıymdastyrǵan bolatyn.
Qoldanystaǵy tizilimdi taldaý nátıjesinde memlekettik qyzmettiń tek 3 paıyzy proaktıvti formatta, 8 paıyzy kompozıttik, al 68 paıyzy eksaýmaqtyq tásildermen kórsetiletini anyqtaldy.
Biryńǵaı tásilderdi qamtamasyz etý maqsatynda MQIA ázirlegen 17 baǵyt boıynsha memlekettik qyzmetter kórsetý rásimderin jetildirý jóninde arnaıy bólim arqyly memlekettik basqarýdy sıfrlyq transformasııalaý qaǵıdalaryn qaıta qaraý usynyldy.
Usynylǵan 17 transformasııalyq tásil proaktıvtiliktiń, kompozıttiliktiń, eksaýmaqtylyqtyń ósýin qamtamasyz etýdi, sondaı-aq qujattardyń merzimderi men sanyn azaıtýdy, anyqtamalyq qyzmetterdi, tolyqqandy emes nemese jartylaı kórsetiletin qyzmetterdi alyp tastaýdy jáne osy salanyń servıstiligin arttyrýǵa baǵyttalǵan ózge de sharalardy kózdeıdi.
Júrgizilgen taldaý nátıjesinde agenttik 30 memlekettik kórsetiletin qyzmetti eksaýmaqtyq formatqa, 251 memlekettik kórsetiletin qyzmetti proaktıvti formatqa, 72 memlekettik kórsetiletin qyzmetti kompozıttik formatqa aýystyrý boıynsha, sondaı-aq memlekettik qyzmet kórsetý merzimin qysqartý boıynsha 273 usynys ázirledi.
Bul qaǵıdalardy memlekettik qyzmetter kórsetýdiń bıznes-prosesterine reınjınırıng júrgizý jáne olardy kórsetý qaǵıdalaryn ázirleý kezinde memlekettik organdar basshylyqqa alatyn bolady.
Mysaly, keıbir qyzmetterdi kórsetý merziminiń basym bóligi memlekettik organdarmen kelisý rásimine jumsalatyny anyqtaldy. Osyǵan baılanysty agenttik kelisý rásimi bar qyzmetter boıynsha bıznes-prosesti sıfrlandyrý arqyly, ony avtomatty túrde júzege asyrýdy usyndy.
Sonymen qatar taldaý barysynda qyzmetterdi kórsetý merzimderin esepteý kezinde biryńǵaı tásil joq ekendigi anyqtaldy. Máselen, normatıvtik quqyqtyq aktilerge sáıkes qyzmetterdi kórsetý merzimderi jumys nemese kúntizbelik kúnderde eseptelýi múmkin.
Osyǵan oraı, agenttik tarapynan qyzmetterdi kórsetý merzimderin birkelki qoldaný maqsatynda, ıaǵnı demalys jáne mereke kúnderinde berilý múmkin (qajettiligine baılanysty) memlekettik kórsetiletin qyzmetterdi qospaǵanda, merzimderdi kúntizbelik kúnderden jumys kúnderine aýystyrý máselesin qarastyrý usynyldy.
Konsýltatıvtik-saraptamalyq top otyrysynyń qorytyndysymen ortalyq jáne jergilikti atqarýshy organdarǵa, otyrysta atalyp ótken usynystardy júzege asyrýǵa qatysty birqatar sheshimdi sharalar qabyldaý, sondaı-aq sıfrlandyrý baǵytynda júrgizilip jatqan jumystardy eskere otyryp, memlekettik qyzmetter kórsetý rásimderin jetildirý boıynsha odan ári jalǵasatyn jumystardy qamtıtyn is-sharalar josparyn bekitý usynyldy.