Senatorlar Olga Býlavkına men Shákárim Buqtuǵutov Shyǵys Qazaqstan oblysynda jergilikti turǵyndarmen, máslıhat depýtattarymen, aımaq basshylyǵymen kezdesti. Júzdesýde óńirdegi medısınany, bilim berý men ónerkásipti damytý máseleleri, joldardyń jaı-kúıi talqylandy.
Rıdderde kópsalaly aýrýhana salý máselesine erekshe nazar aýdaryldy. Mundaǵy eski aýrýhana ǵımaratynyń salynǵanyna 70 jyldan astam ýaqyt ótken bolatyn. Sondyqtan qala turǵyndary jańa qurylystyń aıaqtalýyn asyǵa kútip otyr. Senator Býlavkına respýblıkalyq bıýdjetten qarjylandyrylatyn bul jobanyń saqaldy qurylysqa aınalmaýy mańyzdy ekenin atap ótti.
Depýtattar sondaı-aq óńirdegi Qazaqstan halqy Assambleıasynyń ókilderimen de kezdesti. Kezdesý barysynda taý-ken ónerkásibindegi kadr tapshylyǵyna qatysty ózekti máseleler, joǵary oqý oryndarynda maman daıarlaýǵa arnalǵan grant sany az ekeni aıtyldy. Sonymen qatar densaýlyq saqtaý mekemelerinde MÁMS jelisi boıynsha tólemdi keshiktirý jáne balalarǵa arnalǵan arnaýly mekemeler tárbıeshileriniń jalaqysyn arttyrý máseleleri de qozǵaldy.
Parlamentshiler sapar aıasynda D.Serikbaev atyndaǵy Shyǵys Qazaqstan tehnıkalyq ýnıversıtetiniń jumysymen de tanysty. Senatorlar osy oqý ornyndaǵy stýdentter is júzindegi daǵdylardy ıgerip, avtomobıl júıelerine, atap aıtqanda, elektromobılder men gıbrıd avtomobılderge tehnıkalyq qyzmet kórsetý jáne dıagnostıka jasaý úshin sımýlıasııalyq synaq júrgizetini týraly habardar etildi.