Reseıdiń Iаkýtsk qalasynda VIII «Azııa balalary» oıyndary ótip, elimizdiń sportshylary 17 altyn, 31 kúmis, 59 qola medal oljalap, jalpy esepte 7-satyǵa turaqtady. 1996 jyldan beri turaqty uıymdastyryp kele jatqan «Azııa balalary» oıyndarynda О́zbekstan sportshylary 36 altyn, 31 kúmis, 21 qola medal enshilep, jeke-dara kósh bastady. Jasóspirim sportshylarymyzdyń jetistigin qomsynbaımyz, degenmen sporttaǵy izbasarlardy daıarlaý isinde aqsap turǵan másele de joq emes.
Jýyrda Týrızm jáne sport mınıstrligi Sport jáne dene shynyqtyrý isteri komıtetiniń tóraǵasy Erbol Myrzabosynov respýblıkalyq sporttyq mektep-ınternat-kolledjderdiń basshylaryn jınap, qyzmettik jıyn ótkizdi. Joǵary sportqa laıyqty izbasarlar daıarlaıtyn sporttyq mektep, kolledjderdegi kem-ketikti bútindeý mańyzdy. El sportyn órkendetýge umtylǵan órenderdi mektepke qabyldap alǵannan bastap chempıondyq dárejege jetkizgenge deıingi aralyqtaǵy jumysty júıeli damytý mindeti tur. Qandaı kedergi bar, nendeı túıtkildiń túıinin tarqatý kerek degen saýal qashanda ózekti. Sportshynyń chempıondyq dárejege jetýi bapkerlerdiń biliktiligine tikeleı qatysty. Keleshekte jattyqtyrýshylardyń sapalyq quramyna taldaý jasap, biliktiligi joǵary mamandardy tartý, sondaı-aq daıyndaý ádisterin jetildirý maqsatynda jumys tobyn quryp, toqsan saıyn mamandardyń biliktiligin arttyrý kýrstaryn uıymdastyrý júzege asyrylýy múmkin. Seleksııa jasaqtaý úshin jer-jerden talantty sportshylardy jınaý baǵytynda komıssııa quryp, óńirlerde irikteý ótkizip, kórinbeı júrgen talanttardy taýyp, jınaýdy qolǵa alý qajet. Sonda ǵana daryndy, qarymdy balalardy sportqa tartýdyń jemisin keleshekte kóremiz, eger jumys júıeli júrgizilse. Mektep-ınternattardaǵy sport túrlerin bazalaryna sáıkes toptastyrý kerek. Komıtet tóraǵasy Erbol Myrzabosynov Almatydaǵy K.Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat-kolledjindegi sport túrleriniń keıbiriniń sporttyq bazasy syn kótermeıtinin aıtty. Bolashaq olımpıadashylardy daıarlaıtyn irgeli bilim mekemesinde 17 sport túri qamtylsa, sonyń tek jeteýi boıynsha balalar alańsyz jattyǵý ótkizedi. Al qalǵan 9 sport túriniń bazasy talapqa saı emes. Munyń zardaby aldymen oqýǵa tıetini belgili. Olar ózi qalap tańdaǵan sport túri boıynsha ázirlik ótkizý úshin basqa bazaǵa barýǵa májbúr.
Taǵy bir másele, jas sportshylar tájirıbe jınap, shyńdalýy úshin ulttyq quramalarmen birlesken oqý-jattyǵý jıyndaryn ótkizý múmkindigin arttyryp, sporttyq medısınalyq kómek kórsetýdi jolǵa qoıǵan abzal. Sebebi kez kelgen sporttaǵy joǵary nátıje sportshynyń densaýlyǵyna tikeleı qatysty. Bul, ásirese balalar sportyn damytýda mańyzdy. Dáriger mamandardyń biliktiligin qaıta qarastyryp, qajet bolǵan jaǵdaıda Ulttyq sporttyq medısına jáne ońaltý ortalyǵynyń mamandarymen tize qosyp jumys isteý de artyq bolmaıdy.
«Týrızm jáne sport mınıstrligine qarasty tórt mektep-ınternat-kolledj ben bir respýblıkalyq sport kolledji bar. Búginde joǵary sportqa rezerv daıyndap, keleshek chempıondar osy ortada shyńdalady. Qazir keıbir ınternattardyń daıyndyq bazalary zamanýı talapqa saı bolmaǵandyqtan balalardyń alańsyz shynyǵýyna qolbaılaý bolyp otyr. Sol sebepti sport túrlerin júıelendirý boıynsha baza múmkindikterine saı shoǵyrlandyrýymyz qajet. Osyndaı múmkindik arqyly qaıtalanatyn sport túrlerin azaıtyp, sapaly sportshylar quramyn daıyndaımyz. Mysaly, «Shańyraq» mektep-ınternat kolledjinde semserlesý sporty boıynsha oqıtyn sportshylar kisi aınalyp júre almaıtyn tar jerde ázirlik júrgizedi. Odan da bul sportty bazasy qalyptasqan K.Ahmetov atyndaǵy mektep-ınternat kolledjinde damytqan jón. Sondaı-aq bul sporttyq mekemede dzıýdo sportynan etene damyǵan ortalyq bar. Al Rıdderde qysqy sport túrlerin órkendetý mindeti tur. Qazir ol jerde bazasy joq bolsa da, jeńil atletıka boıynsha sportshylar daıyndalyp jatyr. Bul sport túriniń órken jaıýyna kedergi. Odan da ony ShQO-da bazasy qalyptasqan ınternatqa bergenimiz jón. Sebebi O.Rypakova atyndaǵy sport ortalyǵy sııaqty zamanaýı úlgide salynǵan, sporttyq jabdyqpen qamtylǵan keshenderde shynyǵady», deıdi E.Myrzabosynov.
2026 jyly Italııada ótetin qysqy Olımpıada oıyndary 2028 jyly AQSh-tyń Los-Andjeles qalasynda jalaýy jelbireıtin jazǵy Olımpıada oıyndarynda el úmitin arqalaıtyn sańlaqtardy daıarlaýdy búginnen qolǵa alǵan mańyzdy.