Endi alıaqtar uıaly baılanys operatorlary qyzmetkerleriniń atyn jamylyp halyqty aldaýǵa kóshken. Mundaı alaıaqtyqtyń faktisimen sońǵy kezderi Aqtóbe turǵyndary polısııaǵa jıi júginetin bolǵan, dep habarlaıdy Egemen.kz.
Dál osy faktimen jábirlenýshilerge keltirilgen shyǵyn kólemi birneshe mıllıon teńgeden asqan.
«Aldymen alaıaqtar azamattarǵa telefon soǵyp, ózderin uıaly baılanys operatorynyń qyzmetkeri retinde tanystyrady. Olar telefon nómirińizdiń merzimi ótip ketkenin aıtyp, qyzmet kórsetý merzimin uzartýdy usynady. Eger de uzartýǵa kelisken jaǵdaıda, alaıaqtar SMS-habarlamadan kelgen kodty aıtýdy suraıdy. Kodty alǵannan keıin olar WhatsApp arqyly qońyraý shalyp, ózderin quzyrly organ qyzmetkerlerimiz dep tanystyrady. Sizdi alaıaqtar, jalǵan operatorlar aldap, atyńyzǵa birneshe bankten nesıe rásimdelgenin habarlaıdy», dedi Aqtóbe oblysynyń krımınaldyq polısııa basqarmasynyń aǵa jedel ýákili Baqdáýlet Balmýrzın.
Sondaı-aq olar ózderin Ulttyq qaýipsizdik komıtetiniń, polısııanyń, banktiń jáne t.b. qyzmetkerleri retinde tanystyrǵan. Qaskóıler jábirlenýshilerdi olardyń atyna buryn jalǵan operatorlar rásimdegen nesıelerdi óshiremiz dep aldap, ózderine nesıe alǵan. Barlyq jaǵdaıda jábirlenýshilerdi qarajatty alaıaqtar kórsetken «qaýipsiz» shottarǵa aýdarýǵa mindettegen.
2024 jyldyń shilde aıynda alaıaqtar Aqtóbe qalasynyń turǵynyn dál osyndaı jolmen 8 mıllıon teńgege, ekinshi adam da osyndaıǵa senip, 3 mıllıon teńgesin joǵaltqan. Sonymen qatar taǵy bir turǵyn óz atyna 5 mıllıon teńgege jýyq nesıe rásimdep, alaıaqtarǵa aýdarǵan.
Aqtóbe oblysynyń polısııa departamenti azamattardy mundaı qońyraýlarǵa senbeýge, qońyraý túsken jaǵdaıda dereý úzýge, SMS jáne jeke derekterdegi kodtardy jarııalamaýǵa jáne beıtanys adamdarǵa aqsha aýdarmaýǵa shaqyrady.