Qazaqstannyń «Sana Team» quramasy robototehnıkadan Avstralııada ótken Pacific Open Championship halyqaralyq chempıonatynda jeńimpaz atandy, dep jazady Egemen.kz.
Oǵan 11 el boıynsha 400-ge jýyq bala qatysqan. Fınaldyq kezdesýde Qazaqstan oqýshylary BAÁ komandasymen odaqtasyp, jeńis jolynda kúresip, eki marapatqa ıe boldy: Finalist Alliance Captain jáne «Motivate Award» nomınasııasynda birinshi oryn.
Oqý-aǵartý mınıstrliginiń málimetinshe, elimizdiń atynan «Bilim-ınnovasııa» lıseıi jáne Respýblıkalyq fızıka-matematıka mektebiniń 11-synyp oqýshylary: Daryn Smaıyl, Arnar Dáýletqul, Ádil Tursynǵalı, Abbas Pahrıdın, Osman Akıpbek, Asylhan Ybyraı, Ilııas Áshiralın, Aldııar Dáýletuly, Janaıym Sabyrjan, Ǵazıza Kýngojına qatysty.
Eske salaıyq, QR Oqý-aǵartý mınıstrliginiń qoldaýymen USTEM Foundation qory men «Daryn» RǴPO uıymdastyrǵan Central Asia FIRST Championship Ortalyq Azııa chempıonaty kezinde atalǵan komanda álem chempıonatyna joldama alǵan edi. Chempıonatta jeńiske jetý – oqýshylarǵa álemdik jetekshi joǵary oqý oryndaryna grant alýǵa jol ashady.