Búgin Týrızm jáne sport vıse-mınıstri Mıras Tólebaev Ortalyq kommýnıkasııalar qyzmetinde ótken brıfıng barysynda oıyn bıznesi jáne lotereıa qyzmetin retteý boıynsha qabyldanǵan zańnamadaǵy negizgi jańashyldyqtar týraly tarqatyp aıtyp berdi, dep jazady Egemen.kz.
Oıyn bıznesi máseleleri týraly jańa zańǵa sáıkes, jeke tulǵalardy qumar oıyndar men bás tigýden óz betinshe shekteýdiń eń uzaq merzimi 10 jylǵa deıin ulǵaıtyldy.
Densaýlyq saqtaý mınıstrliginiń málimetinshe, elde 19 lýdoman resmı tirkelgen. Mıras Tólebaev bul praktıkalyq turǵyda naqty sandy kórsetpeıtinine nazar aýdaryp, olardy emdeýdiń jańa tártibi engiziletinin habarlady.
«Lýdomandar memlekettik klınıkalardan kómek suramaıtyny belgili. Esepke alynǵan azamattar JOO-ǵa túse almaıdy, áskerde qyzmet ete almaıdy jáne jumysqa ornalasa almaıdy. Pasıentterdiń kóbi óte kóp aqsha jumsap, jeke uıymdarda ońaltýdan ótedi. Endi memlekettik klınıkalarda da anonımdilik qamtamasyz etiledi», dedi vıse-mınıstr.
Zań kúshine engennen keıin onlaın-kazıno uıymdastyrýshylar Qylmystyq kodekstiń 307-baby boıynsha qylmystyq jaýapkershilikke tartylady. Al oıyn bıznesin zańdy uıymdastyrýshylardyń tizimi mınıstrliktiń saıtynda jáne E-lısenzııalaý portalynda jarııalanǵan.
«Lotereıa termınaldary men tırajdyq elektrondyq lotereıalarǵa tyıym salyndy. Lotereıa operatorynyń elektrondyq ónimderi onyń resmı ınternet-resýrsynda jáne mobıldi qosymshasynda ǵana bolady», dedi Mıras Tólebaev.