Myna ǵalam qyzyqqa toly ǵoı, shirkin. Nege bulaı degenimdi áńgimelep bereıin. 13 jastaǵy Iаır Ýaıtson Izraılde turady. Osydan birneshe kún buryn ákesimen birge «Karmel» taýyna seıil qurady. Áý bastaǵy maqsaty – erekshe tastardy jınap, úıindegi toptamany toltyrý edi. Biraq izdenimpaz bala 18 ǵasyr burynǵy erekshe qazynaǵa jolyqqan.
Ákesi men balasy taý-tas aralap júrip, Ejelgi Rım dáýirindegi karerler men ferma qırandylary saqtalǵan aımaqqa tap bolǵan. Soǵan jaqyn jerde baıyrǵy mola da bar-tuǵyn. Jasóspirim osy aımaqtan Mınerva qudaıy beınelengen 1800 jyldyq saqınany taýyp alǵan. Izraıldiń kóne jádigerler basqarmasynyń habarlaýynsha, jádiger tolyǵymen saqtalǵan ári kórkem beınede desedi.
– Qazbalar men tastarǵa qyzyǵamyn, olardy jınaǵandy jaqsy kóremin. Sondaı bir serýen kezinde kishkentaı jasyl zatty baıqap qaldym. Basynda jaı ǵana tot basqan bolt dep oıladym. Tazalap kórsem, saqına eken. Úıge ákelip, ony muqııat qarap shyqtym. Saqınadan bir qaraǵanda jaýyngerdiń beınesin kórýge bolady. Kóp uzamaı Izraıldiń ejelgi zattar basqarmasyna habarlastyq. Sol kezde saqınany sarapshylar muqııat tekserip, Mınervanyń beınelengenin aıtty, – deıdi Ýaıtson.
Solaı. Jaǵdaıdy tizbektep berdim. Endi joǵarydaǵy tańdanysyma oralaıyn. Kóbine Rım mıfologııasyndaǵy Mınervany grek qudaıy Afınamen teńestiredi. Negizinen Mınerva – soǵys ári danalyq qudaıy. Osyny zerttep otyryp, keıingi jyldary Izraıldiń jaǵdaıy men onyń basyna túsken kezeńdi oıladym. «Qudaıdyń» júzigi týra osy sátte tekke tabylmaǵan bolar degen oı túıdim. Myna ǵalam qyzyqqa toly ǵoı, shirkin!