Qyzylordada eki kún buryn joǵalyp ketken er adam óli kúıinde tabyldy, dep habarlaıdy Egemen.kz.
Eriktiler buǵan deıin 20 shildede joǵalyp ketken 25 jastaǵy er adamdy izdep jatqandaryn habarlaǵan bolatyn.
Onda qyzylordalyq jumystan shyqqannan keıin, úıine oralmaǵany aıtylǵan. Ol oblystyq kópsalaly aýrýhanada jumys istegen.
- TJD, PD qyzmetkerleriniń, Abylaıhannyń týystarynyń jáne ózge de erikti azamattardyń kúshimen izdeý jumystary uıymdastyryldy. О́kinishke qaraı, ol óli kúıinde tabyldy. Imandy bolsyn. Jas jigittiń neden qaıtys bolǵany týraly ázirge belgisiz. Dostar, Abylaıhandy izdeýge at salysqandardyń barlyǵyna rahmet, - dep jazdy "Qyzylorda eriktileri" qoǵamdyq qorynyń atqarýshy dırektory Olga Chebakova Facebook paraqshasynda.
Oblystyq polısııa departamentiniń baspasóz qyzmeti joǵalǵan jas jigitti izdeýge eki kún ishinde PD, polısııa basqarmasy, TJD jeke quramy, eriktiler men jergilikti turǵyndar tartylǵanyn atap ótip, jas jigittiń qaza tapqany týraly aqparatty rastady.
- 23 shildede joǵalǵan adamnyń denesi tabyldy. Bul fakt sotqa deıingi tergep-tekserýlerdiń biryńǵaı tiziliminde tirkelgen. Er adamnyń óliminiń naqty sebebin anyqtaý maqsatynda qajetti sot-medısınalyq saraptama taǵaıyndaldy jáne osy saraptamanyń qorytyndysyn kútip otyrmyz. Tulǵa anyqtaldy. Tergeý áreketteri jalǵasady. Aımaq polısııasy marqumnyń jaqyndary men týystaryna shyn júrekten kóńil aıtady, - dep habarlady vedomstvonyń baspasóz qyzmeti.