Amerıkalyq Erık Vaıhenmaıer kóz torynyń týa bitken aqaýyna qaramastan, Everest shyńyn baǵyndyrǵan azamat. Ol osylaısha, múmkindigi shekteýli adamdardyń ózi kóp nárse tyndyra alatynyn dáleldedi.
Erık bala kezinde zaǵıptyǵyn moıyndamaı, Braıl jazýyn úırenýden bas tartypty. Namysyn qaırap, jastaıynan sportty ómirine serik etedi. Qansha márte súrinse de jigeri jasymaıdy. Nátıjesinde, 2001 jyly Gımalaıdyń shyrqaý shyńyna shyǵyp, álem jurtshylyǵynyń tańdaıyn qaqtyrady. 2002 jyly Solt-Leık-Sıtıde ótken Paralımpıada oıyndarynyń estafetasynda alaý jaǵý qurmetine ıe bolady. «О́mirde kez kelgen adamdy quldyratatyn kedergiler kezdesedi. Biraq biz olardy jeńip, baqytty ómir súre alamyz», deıdi E.Vaıhenmaıer.