Otandasymyz Sanjar Taıjannyń «TaiSan» kompanııasy ınnovasııalyq natrıı-ıondy akkýmýlıatorlar ázirledi. Elektromobılderge arnalǵan batareıalar daıyndap, 1,7 mln eýro tartty.
24 shildede Sanjar Taıjannyń brıtandyq kompanııasy ınvestısııalardyń «pre-seed-raýndyn» sátti ótkizgen. «Taisan» jetekshi ınvestorlary – «EIT InnoEnergy» jáne «TSP Ventures» boldy. Mámilege «Heartfelt VC» pen «Exergon» da qatysty. Negizinen «Eit InnoEnergy» qoryn Eýropalyq odaq 2010 jyly qurǵan edi. Bul sheshim jasyl energetıka salasyndaǵy eski ınnovasııalardy damytý úshin korporatıvtik sektordyń qatysýymen jasaldy. Uıymnyń quramyna 36 aksıoner kiredi. Onyń ishinde «Volkswagen», «Renault», «Siemens», «Schneider Electric», «Total Energies», «Santander Bank» bar. Qor qazirdiń ózinde 25 mıllıard eýroǵa 200-ge jýyq túrli jobany qarjylandyryp otyr. Al «TSP Ventures» – ǵalamnyń ótkir klımattyq máselelerin sheshetin jobalardy qarjylandyratyn brıtandyq qor. Skandınavııa aımaǵyndaǵy «at InnoEnergy» kompanııasynyń bas dırektory Lavına Lýndstrem men onyń uıymy birneshe jyldan beri osy saladaǵy eń joǵary áleýetke ıe natrıı-ıondy akkýmýlıatorlardyń damýyn baqylap kele jatyr. Sol sebepti de otandasymyzdyń jetistigi olardy qatty qyzyqtyrǵan.
– Buǵan deıin biz bul tehnologııany tirkelgen saqtaý júıelerine opsııa retinde paıdalanǵanyn kórdik. Degenmen «TaiSan»-dy tapqan kezde biz natrıı-ıondyq akkýmýlıatorlardy tartqysh batareıalar nemese elektr kólikterine arnalǵan joǵary qýatty batareıalar sııaqty jańa, kúrdelirek qoldanbalardy paıdalaný múmkindigin birden baıqadyq. Biz «TaiSan» komandasymen yntymaqtastyqty bastaǵanymyzǵa óte qýanyshtymyz, – dedi Lýndsrem kompanııanyń resmı baspasóz habarlamasynda.
Sanjar Taıjannyń ózi «Forbes.kz» saıtyna bergen túsindirmesinde áleýetti ınvestorlarmen raýnd ótkizý boıynsha aldyn ala kelissózder segiz aıǵa sozylǵanyn aıtty.
– Tranzaksııanyń ózi eki aptanyń ishinde júzege asty. Bul – bizdegideı ınjenerlik-tehnologııalyq startap úshin óte qysqa merzim. Bizdiń startaptyń ereksheligi ınvestısııa kóleminen de kórinedi. Bul sala úshin 1,7 mıllıon eýro – aldyn ala raýnd úshin óte jaqsy kelisim. Investorlar dástúrli túrde baǵdarlamalyq qamtamasyz etýdi ázirleý salasyndaǵy startaptardy qarjylandyrýǵa kóbirek yntaly, – dedi otandasymyz.
Sonymen qatar ol óziniń de, ınvestorlardyń da batareıa jasaýda qoldanylatyn tehnologııanyń urlanbaýyna muqııat qaraıtynyn atap ótti.
– Bizdiń seriktester bul máselege baıyppen qaraıdy ári olar osy máselelerdi sheshýge kómektesedi. Baqytymyzǵa oraı, biz akkýmýlıatorlardy ártúrli zaýytqa synaqtan ótkizýge jibergen kezde, kontragentterimiz óte sapaly áreket etetinin, bizdiń quqyǵymyzdy buzýǵa tyryspaıtynyn kórdik. Degenmen batareıalardy qaıtarǵan kezde, bireý olardy bólshekteýge nemese «mıkrobaǵdarlamany» zertteýge tyrysatynyn baıqaýǵa bolady. Biraq mundaı oqıǵa áli bolǵan joq, – dedi ol.
Buǵan deıin Sanjar Taıjan óziniń startapyn Ulybrıtanııada tirkegen edi. Onyń kompanııasynda segiz adam, onyń ishinde MIT jáne Imperial College ǵalymdary bar. Olar fýnksıonaldy natrıı-ıondy akkýmýlıatorlardyń jańa tehnologııasyn ázirlep jatyr. Ázirleýshiniń aıtýynsha, onyń batareıalary tezirek zarıadtalady ári energııany kóp qajet etpeıdi. Iаǵnı uzaq saparǵa bir zarıad jetkilikti. Sondaı-aq batareıalardyń qyzmet etý merzimi uzaǵyraq jáne dástúrli lıtıı-ıondy akkýmýlıatorlarǵa qaraǵanda qorshaǵan ortaǵa zııany az.
Keıingi eki jylda Sanjar Taıjan Ulybrıtanııanyń birneshe úkimettik jáne ǵylymı uıymdarynan, sonyń ishinde kólik departamentinen, Faradeı ınstıtýtynan, innovate UK, ozyq qozǵaltqyshtar ortalyǵynan, Koroldik ınjenerlik akademııadan shamamen 500 myń fýnt sterlıng aldy. Ol álemniń ártúrli elindegi avıakompanııalarmen yntymaqtastyq týraly 10-nan astam memorandýmǵa qol qoıdy.