Qazir jasandy ıntellektige jastardyń qyzyǵýshylyǵy ájeptáýir artyp keledi. Onyń bir dáleli – «Nazarbaev Ýnıversıteti janyndaǵy Aqyldy júıeler men jasandy ıntellekt ınstıtýty» taǵylymdamasyna túsken 500 ótinim.
Jyl saıyn Nazarbaev Ýnıversıteti janyndaǵy Aqyldy júıeler men jasandy ıntellekt ınstıtýty (ISSAI) mashınamen oqytý jáne derekter algorıtmderi, jasandy ıntellekt salasynda taǵylymdama ótkizedi. Onda bilim men praktıkalyq daǵdylardy keńinen taratý maqsatynda ýnıversıtet stýdentteri men joǵary synyp oqýshylaryn qabyldaıdy. Eki aılyq taǵylymdama barysynda stýdentter zertteý ortalyǵy derekter taldaýshylarynyń mentorlyǵy, naqty keıster, erekshe jobalarmen jumys isteıdi. Bıyl «Summer Research Program» rekord ornatty. 500-den asa ótinim tústi: onyń 186-sy joǵary oqý orny stýdentterinen bolsa, al 300-den astamy mektep oqýshylarynan. Bul aldyńǵy jyldarmen salystyrǵanda eki ese kóp. Stýdentterdiń arasynan teorııalyq jáne praktıkalyq daǵdylary myqty 23 stýdent tańdaldy. Olar – otandyq jáne sheteldik stýdentter.
«ISSAI» derekter taldaýshysy Aqnur Qarabaı atap ótkendeı, irikteý barysynda tabıǵı tildi óńdeý (NLP) jáne kompıýterlik kórý (CV) jobalarynda jumys tájirıbesi, aǵylshyn tilin jetik bilý jáne joǵary akademııalyq úlgerim de eskerilipti. Al Qorqyt ata atyndaǵy Qyzylorda ýnıversıtetiniń stýdenti Aqjan О́skelen jasandy ıntellekt salasyna tereńirek úńilý úshin ótinim bergen.
– Jaz boıy jasandy ıntellekt jobalarymen jumys isteý múmkindigi maǵan óte úlken múmkindik bolyp kórindi. Baǵdarlama barysynda men veb-skreppıng daǵdylarymdy aıtarlyqtaı jaqsarttym ári jasandy ıntellekt týraly túsinigimdi tereńdettim. Derekterdi jınaý kezinde keıbir saıttarda kúshti qorǵanys pen kúrdeli qurylym bolǵandyqtan qıyndyqtar týdy, biraq bizdiń mentorymyz Batyr Arystanbekov olardyń sheshimin tabýǵa kómektesti, – dedi Aqjan.
«New Uzbekistan» ýnıversıtetiniń stýdenti Kamronbek Mamarozıgov bir jyl boıy derekter taldaýshysy bolyp jumys istegennen keıin, JI men Big Data boıynsha onlaın kýrstardy aıaqtaǵannan keıin osy mamandyqty tańdaýǵa nyq sheshim qabyldaǵan. Baǵdarlamada Kamronbek BeautifulSoup arqyly derekter jınaý boıynsha qundy tájirıbe alyp, modelderdi dál baptaýdy úırendi.
– JI boıynsha onlaın kýrstardan keıin men alǵan bilimimdi praktıkada qoldaný qajettigin túsindim. Baǵdarlama jazǵy demalysty tıimdi ótkizýge, kásipqoılarmen aralasýǵa múmkindik berdi. Ártúrli veb-saıttyń kóptigi qundy derekterdi jınaýdy qıyndatty. Belgili bir saıttarǵa qalaı kirý keregin túsiný úshin birneshe apta qajet boldy. Aldyn ala daıyndalǵan modeldi dál baptaý qarqyndy jumysty qajet etetin qıyn mindet boldy. Degenmen men keńinen qoljetimdi JI tehnologııalaryn jaqsyraq paıdalanýdy úırendim, – deıdi ol.
«ISSAI» mektep oqýshylaryn da taǵylymdamadan ótkizdi. Bıyl 315 ótinimniń ishinen 25 úmitker tańdaldy. Ártúrli óńirden kelgen oqýshylar robot-tensegrıtı, vırtýaldy jáne qosymsha shyndyq salalaryndaǵy jobalarmen jumys istep, robottardy jobalaý, baǵdarlamalaý, 3D-prınterlerdi qoldaný daǵdylaryn úırendi.
Osylaısha, «ISSAI» jazǵy ǵylymı taǵylymdamasy stýdentter men mektep oqýshylaryna jasandy ıntellekt salasynda tabysty mansapqa qajetti praktıkalyq tájirıbe men bilim berip, sıfrlyq álemniń esigin ashty. Mentorlar stýdentterdiń joǵary daıyndyq deńgeıiniń, úmitkerlerdiń biliktiliginiń jyldan-jylǵa ósip jatqanyn aıtty. Tipti «SRP» baǵdarlamasyn sátti aıaqtaǵan stýdentterge ǵylymı assıstent retinde jumys usynylmaq.