Dzıýdodan Parıj Olımpıadasynyń altynyn taǵynǵan Eldos Smetovti týǵan jeri sán-saltanatpen kútip alyp, chempıonǵa qurmet kórsetti, dep jazady Egemen.kz.
Jambyl oblysy Eldos Smetovtyń Parıjden basty júldemen kelýine oraı «Taraz» ortalyq stadıonynda gala-konsert uıymdastyrdy. Sport sheberin ystyq yqylaspen qarsy alýǵa 15 myń turǵyn jınalǵan.
Is-sharada Jambyl oblysynyń ákimi Erbol Qarashókeev Eldos Smetov pen onyń jattyqtyrýshysyn Olımp shyńyn baǵyndyrýymen quttyqtap, Taraz qalasynan 5 bólmeli páter (penthaýs) jáne sońǵy úlgidegi (Lexus 600) avtokóliktiń kiltin tabystady. Sport sańlaǵynyń jeke bapkeri Ǵalymjan Jylgeldıevke 2 bólmeli páter men avtokóliktiń (Hyundai Santa Fe) kilti berildi. Ákimdik baǵaly syılyqtar demeýshiler esebinen berilgenin de qulaqqaǵys etken.
«Olımpıada oıyndarynda elimniń kók baıraǵyn kókke kóterip, ánuranymyzdy shyrqatý meniń bala kezden bergi armanym bolatyn. Sol maqsatqa jetý jolynda aıanbaı ter tóktim. Jaqsylyq Úshkempirov atamyzdyń tilegin oryndaǵanyma óte qýanyshtymyn. Barsha jankúıerlerime erekshe alǵys aıtqym keledi. Qoldaýlaryńyzdy sezindim. Jerlesterime kóp raqmet», dedi Parıj Olımpıadasynyń altyn medal ıegeri Eldos Smetov.
Ǵalymjan Jylgeldıev te jyldar boıy tókken terdiń aqtalǵanyn erekshe atap ótti.
Gala-konsert sońy elimizge tanymal estrada juldyzdarynyń konserttik baǵdarlamasy men otshashýǵa ulasqan.