Amerıkalyq ınvestor Robert Kııosakı «Aqsha – bıliktiń bir túri, biraq qarjy saýaty odan da qudiretti kúsh» deıdi. Aqshany uqypty ustaý, jınaý – kúlli adamzat qalaýy shyǵar. Degenmen de belgili bir qıyndyqtarǵa jıi tap bolyp jatamyz. Bul másele Nurdáýletti de alańdatqan. Aqyry oılana kele, ol qarjyny qadaǵalaıtyn «Kiris-Shyğys» qosymshasyn jasaǵan.
Nurdáýlet Ábdikaıymov Astanada turady. «Astana IT University»-inde ınjener-baǵdarlamashy mamandyǵynda oqıdy. Qatarlastarynyń, óziniń, aınalasyndaǵy adamdardyń aqshany saýatty ustaı almaıtynyn túsingen ol osy taqyrypty zertteı bastaǵan. Zertteı kele, eń durysy, kiris-shyǵysty jazyp otyrý degen sheshimge kelgen. Solaı shyǵyn men kiristi baqylap otyratyn, sondaı-aq osy kórsetkishter boıynsha ótken aıdaǵy statıstıkany kórsetetin qosymsha jasaǵan.
– Eger siz qarjylaı daǵdarys pen kútpegen jaǵdaıdan saqtanǵyńyz kelse, shyǵyndaryńyzdy josparlaý men qadaǵalaýdyń mańyzyn atap ótkim keledi. Bul oıyn-saýyq pen demalystan múldem bas tartý degen sóz emes. Tek shyǵys-kiristi baqylaý kerek. Bul iste biraz qınaldym, sondyqtan da jaǵdaıdy baqylaýǵa alatyn qosymshany jasadym, – deıdi talapty jigit.
Naryqta mundaı qosymshalar kóp. Túr-túri bar. Bári aqyly. Odan keıin otandyq ári qazaq tilindegisi joq desek te bolady. Sondyqtan da halyqqa paıdaly bolý úshin ana tilimizde qyzmet kórsetetin qosymsha jasaǵan. Ári tegin.
Qosymshanyń qazaq tilinde bolýyna Nurdáýlet basa mán bergen. «Ana tilimde bolýy – meniń ustanymym», dedi ol. Nıetine súısindik. Degenmen ol ózge tildegi paıdalanýshylardy da eskerýsiz qaldyrmaǵan. Orys nemese aǵylshyn tilin de tańdaýǵa bolady.
– 2023 jyldyń qarashasynda naryqty zertteı bastaǵan kezde jasaımyn dep bel býdym. Analogterdiń kópshiliginde jazylymnan keıin ǵana negizgi múmkindik bar ekenin túsindim. Paıdalanýshylarǵa tegin nusqada tolyq fýnksıonaldylyq bergim keldi. Dızaındy dástúrli qazaq stılimen baılanystyrdym. Jylýlyq pen jaılylyq sezimin týdyratyn aqshyl qońyr tústi tańdadym. Demo bir aıda daıyn boldy. Aıtpaqshy, basynan bastap «App Store» dúkeninde qosymshany shyǵaratynymdy bildim. Basynda biraz qıyndyq boldy. Qazir qosymsha kópshiliktiń kóńilinen shyǵyp, jumys istep tur, – dedi joba avtory.
Qosymshanyń fýnksıonaldyǵy ázirge shekteýli ekenin moıyndaý kerek. Synaq merziminde desek te bolady. Nurdáýlet aldaǵy ýaqytta jańa múmkindikterge esik ashyp, erekshe bólimder qosýdy josparlap otyr. Oǵan «LinkedIn» jáne «TikTok»-ta post jarııalaǵannan keıin qarapaıym adamdardan da, ázirleýshilerden de jaqsartý boıynsha kóptegen usynys túsken. Shyǵyn sanattaryn qosý, avtomatty jańartý, dızaındy jaqsartý josparlary bar. Eger ónim óz aýdıtorııasyn taýyp, nazar aýdartsa, ınvestısııa tartpaq. Solaı elimizdiń qarjylyq saýatyn arttyrýǵa kishkene bolsyn úles qospaq.