On bes jastaǵy amerıkalyq Heman Bekele qaterli isikke qarsy sabyn oılap tapty. Sol sebepti «Time» jýrnaly ony «Jyl balasy» dep tanydy.
Heman hımııaǵa alty jasynan qyzyǵýshylyq tanytqan. Sol kezdiń ózinde-aq ol adamdardy kúnniń zııandy áserinen qorǵaýdy armandaǵan. Osy ıdeıamen Heman zertteýshiler baıqaýynda jeńiske jetip, 25 000 dollar kóleminde syıaqy aldy. «Sabyn – kúndelikti qoldanylatyn zat. Sondyqtan teri obyrymen kúreste tıimdi nárse. Kóp adam álemde ashylatyn jańalyqtyń bári ashyldy dep oılaıdy. Joq, ıdeıanyń shegi bolmaıdy. Álemdi jaqsartýdy jalǵastyra berý kerek», deıdi jas ǵalym.
Gúl kilem
Belgııa astanasy Brıýsseldiń ortalyǵyna myńdaǵan gúlden alyp kilem tóseldi. Máńgilik turmasa da, mán-maǵynasy zor týyndy qalaǵa kelgen qonaqtardyń kóz qýanyshyna aınalǵan.
Mundaı kilemdi Brıýsselde eki jylda bir ret qana kórýge bolady. Onyń ózinde arnaıy bir taqyrypqa negizdeledi. Uzyndyǵy – 77 metr, eni 24 metr bolatyn alyp kilemdi tóseý úshin bıyl 130 erikti jumyldyrylǵan. 500 myń Narǵyzgúlden jasalǵan kilemdi kópshilik tek tórt kún ǵana tamashalaıdy. Odan soń sýreti ashyqhattar men kúntizbelerge basylyp, aldaǵy eki jylda Brıýsseldiń basty rámizine aınalady.
Eń alǵashqy fotosýret
Adamzat tarıhyndaǵy eń alǵashqy fotosýret 1826 jyly túsirilgen. Ataýy – «Terezedegi kórinis». Ony kadrǵa alǵan – fransýzdyq ónertapqysh Jozef Nısefor Neps edi.
Sheberhana terezesindegi kórinisti fotosýretke túsirý Neps myrzanyń 14 saǵat ýaqytyn alypty. Sýrettiń sapasy nashar bolǵanymen, fotografııa tarıhynyń bastaýy osy keskinnen bastalady. Al tarıhı sýrettiń túpnusqasy qazirgi tańda Tehas shtatynyń Ostın qalasyndaǵy zertteý ortalyǵynda saqtaýly tur.