Sybaılas jemqorlyqqa qarsy is-qımyl agenttigi Astana LRT JShS-nyń burynǵy basqarma tóraǵasy Talǵat Ardanǵa qatysty qylmystyq isti tergep jatyr. Bul týraly Egemen.kz Antıkorǵa silteme jasap habarlaıdy.
- Qazirgi ýaqytta tergeý nátıjesinde aýyr qylmys jasaýda jınalǵan dálelder kúdikti T. Ardan áreketterin Qylmystyq Kodeksiniń 361-baby 4-bóligi 3-tarmaǵy boıynsha saralaýǵa múmkindik berdi. Qylmystyq-prosestik kodeksiniń 208-baby 1-bóligine sáıkes kúdikti jaýap alýǵa shaqyrylady, - delingen habarlamada.
Antıkor málimetinshe, kúdikti T. Ardan Qazaqstan Respýblıkasynan tys jerde bolýyna jáne kelýden jaltarýyna baılanysty Sybaılas jemqorlyqqa qarsy qyzmet QPK-niń 205-babynyń 3-bóligin basshylyqqa ala otyryp, kúdiktini shaqyrý týraly habarlamany buqaralyq aqparat quraldarynda jarııalaıdy.
- Jaýap alý jáne kúdiktiniń is-áreketin saralaý týraly qaýlyny jarııalaý úshin T. Ardan 2024 jyly 23 tamyzda saǵat 09:00-de Qazaqstan Respýblıkasy, Astana qalasy, Qabanbaı batyr dańǵyly, 19, B blogy mekenjaıynda ornalasqan Qazaqstan Respýblıkasy Sybaılas jemqorlyqqa qarsy is-qımyl agenttiginiń ákimshilik ǵımaratyna jedel-tergeý tobynyń basshysy J. О́tepqalıevke kelý qajet. Kúdikti tergeý áreketterine qatysý úshin qorǵaýshyny derbes shaqyrýǵa ne qylmystyq prosesti júrgizýshi organnyń qorǵaýshynyń qatysýyn qamtamasyz etý týraly ótinishhat berýge quqyly (QPK 68-baby), - dedi quzyrly organ ókilderi.
Eger qorǵaýshyny kúdikti nemese onyń zańdy ókilderi, sondaı-aq olardyń tapsyrmalary boıynsha basqa adamdar shaqyrmasa, qorǵaýshynyń qatysýyn qylmystyq prosesti júrgizetin organ qamtamasyz etedi ( QPK 67-baby).