Atyraýdaǵy jekemenshik balabaqshalardyń birinde tárbıeshi bir jarym jastaǵy búldirshinniń qolyn jaraqattap, denesin kúıdirgen. Eń soraqysy, bóbekjaı ákimshiligi bul isti jyly jaýyp qoımaqshy bolǵan, dep habarlaıdy Egemen.kz.
Almaty.tv málimdegendeı, jaǵa ustatarlyq oqıǵa bir apta buryn qaladaǵy «Ý Petrovy» jekemenshik balabaqshasynda bolǵan. Ázirge jaǵdaıdyń qalaı bolǵanyn tek zardap shekken balanyń anasynan bile aldyq. Onyń sózinshe, áýeli tárbıeshi búldirshinniń qolyn jaraqattap, arada bir kún ótkende denesin kúıdirgen. Qatty zaqym alǵan búldirshin ábden shoshynyp qalǵan. Qazir ol mekemeniń mańyna jolaǵannan-aq jylaıdy. Onyń ústine, balanyń kishi dáretke bara almaı qalǵany taǵy bar.
– Basqa balalar zardap shekpese eken deımin. Bári qyrýar aqsha tólep berip otyr. Balamdy kúıdirgenin aıtpaı, jedel járdem shaqyrmaı, qorlady. Zań aldynda jaýap bersin! Qolyn syndyrdy. Olar aqtalyp jatyr, ol qalaı kúıedi, oılańyzshy? – dedi ata-ana Aqjan Nurǵazıeva.
Dárigerler «búldirshiniń denesiniń 6 paıyzy kúıgen» deıdi. Sultannyń jaǵdaıy jaqsy, úıine jiberildi.
– 1 jas 7 aılyq balany ata-anasy úıden alyp keldi. Bókse jáne sany 1-2 dárejeli kúıik shalǵan. Naýqas úıine shyǵaryldy. Jaǵdaıy turaqty. Ary qaraı emin jalǵastyryp, jaqpa maı jaǵýy kerek, – dedi oblystyq balalar aýrýhanasy dırektorynyń emdeý isi boıynsha orynbasary Erjan Esbolaev.
Atalǵan derek boıynsha qazir polısııa departamenti de tergeýdi bastady. Qylmystyq is «kámeletke tolmaǵan adamdy tárbıeleý jónindegi mindetterdi oryndamaý» babymen júrgizilip jatyr.
– Atyraý qalasynyń turǵynynan balabaqshaǵa baratyn balasynan kúıikke uqsas dene jaraqaty bar degen aryz kelip túsken. Aryz boıynsha keshendi tergeý amaldary júrgizilip, tekserý barysynda oblystyq balalar aýrýhanasy dárigerleriniń qorytyndysymen 2023 jyly týǵan balanyń ekinshi dárejeli kúıik ekeni anyqtaldy. Sot-medısınalyq saraptamalar taǵaıyndaldy, – dedi oblystyq polısııa departamentiniń baspasóz hatshysy Meıirim Erdáýlet.
Mektepke deıingi uıym jumysyn áli de jalǵastyryp jatyr. Mekeme áleýmettik jelidegi paraqshalaryna atalǵan jaǵdaıdyń jalǵan ekenin jazǵan. Ázirge istiń qalaı bolǵany, balanyń denesine kimniń jaraqat salǵany resmı dáleldengen joq. Is baqylaýda bolady.