Prezıdent Qasym-Jomart Toqaev Qazaqstan halqyna kezekti Joldaýyn jarııalap jatyr, dep habarlaıdy Egemen.kz Aqorda baspasóz qyzmetine silteme jasap.
«Agroónerkásip keshenin tikeleı sýbsıdııalaý tásilinen arzan nesıe berý tásiline birtindep kóshý – asa mańyzdy mindet. Bólingen qarajattyń bári tıimdi jumsalýǵa tıis. Alaıda shyndyqqa janaspaıtyn aqparat berý, basqasha aıtqanda, málimetterdi burmalaý aýyl sharýashylyǵyndaǵy shynaıy ahýaldy baǵalaýǵa kedergi keltirip otyr», dedi Prezıdent.
Memleket basshysynyń aıtýynsha, arnaıy komıssııa 2 mıllıon iri qara jáne 3 mıllıonnan astam ýaq mal sanda bar, sanatta joq ekenin anyqtady. Egin sharýashylyǵy salasynda da osyndaı jaıttar bar ekeni belgili boldy. Qasym-Jomart Kemeluly atap ótkendeı, munyń bári – memleketten sýbsıdııa alý úshin jasalǵan kózboıaýshylyq. Ondaı qylmystyq áreketterge tosqaýyl qoıý qajet. Al mundaı ispen aınalysqan adamdardy jaýapkershilikke tartý kerek.
«Jer – aýyl sharýashylyǵy salasyna ınvestısııa tartýdyń basty kepili. Jer telimderin qaıtarý jónindegi arnaıy komıssııa ákimdikterdiń aýyl sharýashylyǵy alqaptaryn konkýrs ótkizbeı-aq berý týraly eki myńnan astam zańsyz sheshim qabyldaǵanyn anyqtady. Bul másele qatysty ekiushty ustanym bolmaýy qajet. Zańsyz alynyp, paıdalanylmaı jatqan jer ońtaılandyrylǵan rásim boıynsha memleketke qaıtarylýǵa tıis. Al jerdi paıdalanýshy oǵan ınvestısııa salyp, adal eńbek etip jatsa, jumysqa bóget jasamaý kerek. Sondaı-aq onyń aýyldy kórkeıtip, turǵyndarǵa turaqty jumys berip otyrǵanyn da eskergen jón», dep túıindedi el Prezıdenti.