Prezıdent búgingi Joldaýynda el ekonomıkasyn ártaraptandyrýǵa erekshe toqtaldy. Sonyń biri - aýyl turǵyndaryna óz ónimderin óńdeýge jáne satýǵa múmkindik beretin ınfraqurylym qurý múmkindigin qalyptastyrý máselesi, dep jazady Egemen.kz.
Qasym-Jomart Toqaev aýyl turǵyndarynyń ál-aýhatyn kóterý isine jerden paıda kórip otyrǵan menshik ıelerin belsendi atsalysýǵa úndedi.
«Kóptegen menshik ıesi ózderi paıdasyn kórip otyrǵan jerden myńdaǵan shaqyrym alysta turady, ondaǵy aýyl turǵyndaryna qamqorlyq jasaý oıyna kirip te shyqpaıdy. Bizge mundaı jer ıeleriniń qajeti joq. Úkimet pen Bas prokýratýra olarǵa qatysty máseleni myqtap qolǵa alýǵa tıis.Azamattar, ásirese, aýyl turǵyndary zańdy túrde tabysty jumys istep, bolashaǵynyń qamyn ózi oılaýy kerek. Olardy osyǵan yntalandyrý – memlekettiń basty mindetiniń biri», dedi Memleket basshysy.
Prezıdent byltyr bastalǵan «Aýyl amanaty» jobasy aıasynda atqarylyp jatqan jumystardyń nátıjesi jaman emes ekenin atap ótti.
«Endi osy joba aıasynda taǵy bir jańa tásildi, ıaǵnı «taýar nesıesin» berý máselesin qarastyrý qajet. Ár aýdanda azamattarǵa túrli aýyl sharýashylyǵy daqyldaryn ósirýdi úıretetin ortalyq ashý qajet. Osyndaı joba «Amanat» partııasynyń bastamasymen Jambyl oblysy Merki aýdanynda júzege asyryldy. Úkimet pen ákimder bul tájirıbeni basqa da aımaqtarǵa taratýdy oılastyrýy kerek.Jalpy otandyq bızneske jáne shetel ınvestorlaryna jol ashý – Úkimet pen barlyq memlekettik organnyń mindeti. Al olardyń, ıaǵnı bıznestiń jáne ınvestorlardyń zańdy qyzmetine kedergi jasaý asa aýyr quqyq buzýshylyq dep sanalýǵa tıis. Demek ondaı áreketke jol bergender tıisti jazasyn alady. Men bul týraly únemi aıtyp júrmin. Al kásipkerler men ınvestorlar óz jumysyn adal júrgizip, zańdy saqtap, salyq tóleýden jaltarmaýy kerek», dedi Prezıdent.