Elimiz halyqty áleýmettik qorǵaýdyń sıfrlyq transformasııasyna ınnovasııalyq «GovTech» sheshimderin usyndy.
Azııa-Tynyq muhıty mınıstrlik konferensııasynda sıfrlyq ınklıýzııa jáne transformasııa boıynsha elimizde júzege asyrylǵan ınnovasııalyq «GovTech» sheshimderi usynylǵan edi. Olardyń ishindegi negizgi joba – «Sıfrlyq otbasy kartasy». Ol áleýmettik saladaǵy memlekettik qoldaýdyń ádiletti bolýyna baǵyttalǵan. Jobanyń negizgi mindetteriniń biri – áleýmettik táýekelderdiń aldyn alý, paıda bolý belgilerin anyqtaý úshin dabyl kózi bolý, osylaısha memlekettiń áleýmettik mindettemelerin boljaý quralyna aınalý.
– Búgin biz Azııa-Tynyq muhıty aımaǵynyń belsendi sıfrlyq transformasııasynyń kýási bolyp otyrmyz. Qazaqstan óz kezeginde el ishinde ǵana emes, shekaradan tys jerlerde de moıyndalǵan ınnovasııalyq sıfrlyq sheshimder kóshbasshysyna aınaldy. BUU DB qoldaýymen ázirlengen «Otbasynyń sıfrlyq kartasy» áleýmettik qorǵaý tólemderi júıesin ózgerte alatyn sıfrlyq quraldardyń mysaly boldy. Bul áleýmettik qoldaýdyń muqtaj adamdarǵa tıimdi ári ashyq túrde kórsetiletinin qamtamasyz etedi, – dedi BUU-nyń Azııa jáne Tynyq muhıty óńirine arnalǵan ekonomıkalyq jáne áleýmettik komıssııasynyń (ESKATO) Atqarýshy hatshysy, BUU Bas hatshysynyń orynbasary Armıda Salsııa Alıshahbana.
Búginde «Otbasynyń sıfrlyq kartasy» 100-den astam áleýmettik-ekonomıkalyq kórsetkishterdi paıdalanady. Bul ony áleýmettik qorǵaý salasyndaǵy sheshimder qabyldaý úshin senimdi derekkózge aınaldyrady. 2022 jyly osy ınnovasııalyq platforma iske qosylǵannan beri otandastarymyz 2,2 mıllıonnan astam áleýmettik qyzmet aldy.
– Sıfrlyq transformasııa ómirdiń barlyq salalaryn qamtyp otyr. Áleýmettik sala da tys qalǵan joq. Búginde elimiz áleýmettik salany sıfrlandyrýda kóshbasshylardyń biri bolyp, óz azamattary úshin onlaın qyzmetterdi belsendi túrde damytyp keledi. 2022 jyldyń qorytyndysy boıynsha BUU-nyń onlaın qyzmetter ındeksinde Qazaqstan álemde segizinshi orynǵa ıe boldy. «Otbasynyń sıfrlyq kartasy» – ár otbasynyń ál-aýqat deńgeıin baǵalaýǵa, onyń áleýmettik qoldaýǵa muqtajdyǵyn anyqtaýǵa múmkindik beretin biregeı qural. Bul qoldaý sharalaryn ýaqtyly túzetýge jáne áleýmettik oqshaýlanýdy boldyrmaýǵa múmkindik beredi. Sonymen qatar júıe áleýmettik saıasattaǵy ashyqtyq pen eseptilikti arttyrady, – dedi Eńbek jáne halyqty áleýmettik qorǵaý mınıstri Svetlana Jaqypova.
Mınıstr atap ótkendeı, elimiz «GovTech» sheshimderiniń kóshbasshylarynyń biri retinde tanylyp, sıfrlyq ekojúıesin qarqyndy damytýdy jalǵastyryp keledi. Osy salanyń damýynyń nátıjesinde paıda bolǵan negizgi bastamalardyń qatarynda bıznestegi derekterdi saralaıtyn ári básekelestik ortany arttyrý quralyna aınalǵan «Smart Bridge» portaly bar. «Smart Data Ukimet» aqparattyq-taldaý júıesi mańyzdy memlekettik sheshimder qabyldaý úshin Úkimetti derektermen qamtamasyz etetin ınnovasııalyq ónimge aınaldy. Al «eOtinish» platformasy tyńdaýshy úkimet qaǵıdattaryn júzege asyrady. Sondaı-aq elimiz jasandy ıntellekt negizinde birneshe otandyq jobalardy, sonyń ishinde qoǵamdyq keńistik pen jol qozǵalysy qaýipsizdigi júıesin ázirledi. Júıeni engizý toǵyz pılottyq qalada qoǵamdyq oryndardaǵy qylmystar men ólimge ákeletin jol-kólik oqıǵalarynyń sanyn aıtarlyqtaı azaıtty. Innovasııalar, zertteýler jáne yntymaqtastyq ortalyǵyna aınalatyn ornyqty damý úshin sıfrlyq sheshimder ortalyǵyn qurý da aldaǵy ýaqytta júzege asady. Ortalyq Ornyqty damý maqsattaryna (ODM) jetýge tikeleı yqpal etetin sıfrlyq sheshimderdi engizýde mańyzdy ról atqaratyn bolady. Qazirdiń ózinde Azııa-Tynyq muhıty aımaǵy elderine memlekettik qyzmetterdi usyný, bultty qujat aınalymy, salyq salý, kedendik rásimder jáne taǵy basqa sheshimderdi qamtıtyn 23 sheshimdi usynýǵa daıyn.
– Biz ınnovasııalyq sheshimder arqyly ODM-dy iske asyrýdy jedeldetýge degen ustanymyn rastaımyz. Sıfrlyq ınklıýzıvtilik sıfrlyq transformasııanyń artyqshylyqtaryn barlyǵyna qoljetimdi etý, sıfrlyq alshaqtyqty joıý jáne qaýymdastyqtardyń quqyqtary men múmkindikterin keńeıtedi dep oılaımyz. Tehnologııalar ornyqty damýǵa yqpal etetin bolashaqty qura otyryp, biz barlyǵyna arnalǵan ádil jáne ınklıýzıvti álemdi jasaı alamyz, – dedi Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev.
Rasymen de, ınklıýzıvti sıfrlyq qoǵamdyq ınfraqurylymdy qurý Ornyqty damý maqsattaryna qol jetkizýdi jedeldete alady. Sonyń ishinde teńsizdikti azaıtý jáne memlekettik ınstıtýttarǵa qoǵamdyq senimdi arttyrý da bar. Sıfrlandyrýdyń katalızatorlyq áleýetin paıdalana otyryp, Birikken Ulttar Uıymynyń Damý baǵdarlamasy (BUUDB) búkil álemdegi úkimetterge, sonyń ishinde Qazaqstanǵa sıfrlyq transformasııa máselelerinde kómek kórsetedi.
– «Otbasynyń sıfrlyq kartasy» jobasy Qazaqstandaǵy BUU DB-men seriktestikte júzege asyryldy. 2023 jyly bul ınnovasııalyq sheshim BUU-nyń shtab-páterinde BUU-nyń Joǵary deńgeıdegi saıası forýmynda, sondaı-aq Nıý-Iorktegi BUU Bas Assambleıasy kezinde «Sıfrlyq kún» aıasynda usynylyp, ODM-ǵa qol jetkizý úshin jetekshi jahandyq sıfrlyq bastamalardyń qataryna kirdi. Bıylǵy jyldyń aqpan aıynda Dýbaıda ótken Dúnıejúzilik úkimettik sammıtte Qazaqstannyń «Otbasynyń sıfrlyq kartasy» ınnovasııalyq jobasy «Inklıýzıvti sıfrlyq transformasııa» sanatynda úzdik dep tanylyp, 2024 jylǵy «GovTech Prize» bedeldi syılyǵyn aldy. «BUU DB Qazaqstan Úkimetimen seriktestikti joǵary baǵalaıdy, ol eń osal toptardyń qajettilikterin eskeretin sıfrlyq transformasııa kún tártibin ilgeriletýde. «Otbasynyń sıfrlyq kartasy» jobasy – jańa tehnologııalar, seriktestik jáne strategııalyq kózqarastyń sınergııasynyń tamasha mysaly, ol «eshkimdi artta qaldyrmaý» úshin qajetti ózgeristerdiń katalızatoryna aınaldy. Bul qazaqstandyqtardyń ınklıýzıvti damýy men áleýmettik ál-aýqatyna qaraı mańyzdy qadam, – degen pikir bildirdi elimizdegi BUU DB Turaqty ókili Katarjına Vavernıa.
Aıta keteıik, bul áleýmettik qorǵaý júıesiniń sıfrlyq transformasııasy týraly tájirıbe men bilim almasý alańyna aınalǵan qatarlas is-shara elimizdegi BUU-nyń Damý baǵdarlamasymen jáne Eńbek jáne halyqty áleýmettik qorǵaý mınıstrligi, Sıfrlyq damý, ınnovasııalar jáne aeroǵarysh ónerkásibi mınıstrligimen birlesip uıymdastyryldy.