Jýyqta Ulan aýdanyna jumys saparymen barǵan oblys ákimi Ermek Kósherbaev Tavrııa aýylyn basyp ótetin kúrejolda ortasha jóndeý jumystary júrgiziletinin aıtqan edi. Búginde atalǵan ýchaskede jol jumystary qyzý júrip jatyr.
Aıta keteıik, eldi mekendi basyp ótetin 600 metr jolǵa asfalt tóseý bastalypty. Merdiger kompanııa ókilderi jumysty bir aı ishinde aıaqtaýǵa tıis.
– Tavrııa aýylynyń ishimen ótetin bul jol ýchaskesi oıdym-oıdym bolyp qalǵan edi. Bıyl «Jol jyly» aıasynda oblystyq bıýdjetten 47 mln teńge bólinip, jóndeý jumystary qolǵa alyndy. Jobalyq-smetalyq qujatqa sáıkes, 600 metr jolǵa 6 santımetrlik jáne 4 santımetrlik eki qabat asfalt tóseledi. Merdiger kompanııa bir aı ýaqyt ishinde jumysty tolyǵymen aıaqtaýy kerek. Qazir jumys josparǵa saı júrip jatyr. Sondaı-aq Tavrııa aýylynyń ishin kesip ótetin jolmen júretin kólik aǵyny kóp bolǵandyqtan aýyl turǵyndarynyń qaýipsizdigi úshin jaıaý júrginshi jolaqtary men ózge de jol belgileri jańartylady, – dedi Tavrııa aýyldyq okrýgi ákiminiń orynbasary Daıan Meıirhanuly.
Aýyl ishimen júk kólikteri de jıi qatynaıdy. Sondyqtan aınalma jol salý jaǵy da qarastyrylyp jatqan kórinedi. Jobanyń qujattary bekitilgen. Jol túsetin jer ýchaskesiniń máselesi oń sheshildi. Bul jóninde óńir basshysy aýdanǵa jumys saparmen barǵan kezde de aıtqan.
– Aýyldy qaq jaryp ótetin bul jol tozǵandyqtan, jergilikti turǵyndarǵa da, jolaýshylarǵa da qolaısyz edi. Dál osy jolda kólikterdiń dóńgelegi jarylǵan kezder de boldy. Bıyl, mine, jol jóndelip jatyr. Aýyldyqtar dán rıza. Jol belgileri de jańartylatynyn estip, qýanyp jatyrmyz. Mektepke baratyn balasy bar ata-analar alań bolyp júrýshi edi. Sondyqtan bul óte durys sheshim boldy, – deıdi aýyl turǵyny Erbol Qudaıbergenuly.
Merdiger kompanııa ókilderi kún raıy qolaısyzdyq týǵyzbasa, jumysty ýaqytynda aıaqtaýǵa ýáde berip otyr.
Shyǵys Qazaqstan oblysy,
Ulan aýdany