2024 jyldyń 8-13 qyrkúıegi aralyǵynda Astanada Ortalyq Azııanyń kóshpeli halyqtarynyń dástúrlerinen kele jatqan etnıkalyq sport túrlerine arnalǵan iri halyqaralyq shara – V Dúnıejúzilik kóshpeliler oıyndary ótedi. Bul oıyndar Qazaqstannyń mádenı-tarıhı murasyn pash etetin mańyzdy alańǵa aınalady, dep habarlaıdy Egemen.kz QR Mádenıet jáne aqparat mınıstrliginiń baspasóz qyzmetine silteme jasap.
«Is-sharaǵa vedomstvolyq baǵynysty uıymdar men oblystyq shyǵarmashylyq ujymdardy qosa alǵanda, 3 000-ǵa jýyq ónerpaz qatysady. 8-shi qyrkúıek kúni saǵat 16:00-de Dúnıejúzilik kóshpeliler oıyndarynyń ashylý saltanaty aldynda otandyq estrada juldyzdarynyń qatysýymen konsert ótedi. Baǵdarlamada mýzyka, bı jáne dástúrli óner arqyly qazaq mádenıetiniń san alýan baılyǵy kórermen nazaryna usynylady», delingen vedomstvo habarlamasynda.
Konsert aıaqtalǵannan keıin resmı ashylýy saǵat 19.00-de bastalady. Ashylý saltanatynda zamanaýı sahnalyq tehnologııalar men mýltımedııalyq dızaın qoldanylǵan, 2 saǵattyq aýqymdy mýzykalyq-teatrlandyrylǵan qoıylym kórsetiledi.
«Ashylý saltanaty dástúrli túrde sport delegasııalarynyń sherýinen bastalyp, sońynda Qazaqstannyń Halyq ártisi Dımash Qudaıbergenniń oryndaýyndaǵy halyqtar dostyǵy men birligi týraly mýzykalyq kompozısııamen túıindeledi», dep atap ótti mınıstrlik.
Ár elden kelgen sportshylar at jarysy, ulttyq kúres, sadaq atý jáne dástúrli aqyl-oı oıyndary syndy 21 etnıkalyq sport túrinen baq synasady. Barlyǵy 97 medal jıyntyǵy sarapqa salynady.
Is-sharanyń tikeleı translıasııasyn «Qazaqstan», «Qazsport», «Jibek Joly», «Habar» telearnalarynan kórýge bolady.
Aıta keteıik, Dúnıejúzilik kóshpeliler oıyndary kóshpendi halyqtardyń ulttyq sporty men mádenı murasyn nasıhattaýdy maqsat etedi. Alǵashqy oıyndar 2014 jyly Sholpan-atada (Qyrǵyz Respýblıkasy) ótti. Sodan beri eki jylda bir ret uıymdastyrylyp keledi. Kóptegen sportshy men kórermen qatysatyn bul is-shara kóshpeli mádenıettiń jahandyq mańyzyn kórsetedi.