Premer-mınıstr Oljas Bektenovtiń tóraǵalyǵymen «Atameken» kásipkerler palatasy men iri bıznes ókilderiniń qatysýymen otandyq kásipkerler keńesiniń otyrysy ótti. Maqsat – kásipkerlikti damytýdyń ózekti máselelerin talqylaý, odan ári ózara is-qımyl sharalaryn qarastyrý.
Oljas Bektenov memleket ınvestısııalyq tartymdylyqty arttyrý, elimizdiń ónerkásiptik áleýetin ashý, ınfraqurylymdyq máselelerdi sheshý jáne ekonomıkanyń naqty sektoryn damytý boıynsha aýqymdy jumys atqaryp jatqanyn atap ótti. Iri bıznes elimizdiń tehnologııalyq jáne ınnovasııalyq damýynda mańyzdy ról atqarady. Shaǵyn jáne orta kásipkerlikti damytýǵa múmkindik beredi. Talqylaý barysynda energetıka, óńdeý ónerkásibi, munaı-gaz sektory, taý-ken metallýrgııa kesheni, agroónerkásip kesheni, kólik jáne qarjy, densaýlyq saqtaý, IT, týrızm salalarynyń ókilderi óz usynysyn bildirdi. Metaldardy tereń óńdeý, munaı-gaz hımııasy jáne basqa da basym salalardaǵy jańa jobalarǵa basa nazar aýdara otyryp, otandyq taýar óndirýshilerdi qoldaý máseleleri kóterildi.
Elishilik qundylyqty damytýǵa erekshe kóńil bólindi. Úkimet «Atameken» UKP-men birlesip, taýarlardaǵy, jumystar men kórsetiletin qyzmetterdegi otandyq qamtý úlesin aıqyndaý boıynsha jańa ádisnamany ázirlep jatyr. Úkimet basshysy jańa tetik anaǵurlym ádil bolatynyn ári otandyq kásiporyndardyń damýyna eleýli serpin beretinin aıtty. Tıisti qurylymdarǵa júrgizilip jatqan jumysty jedeldetý tapsyryldy. Jasandy ıntellekt júıelerin qoldanýdy keńeıtý jáne sıfrlyq tehnologııalardy damytý máseleleri qaraldy. Ekologııalyq taza, energııa únemdeıtin jáne tómen kómirtekti jobalardy iske asyrýǵa baǵyttalǵan týrızm, turǵyn úı-kommýnaldyq sharýashylyq, «jasyl» qarjylandyrý salasyn damytýdyń mańyzdy ekeni aıtyldy.
Talqylaý barysynda elimizdi turaqty energııamen qamtamasyz etý máselesine nazar aýdaryldy. Bıznes ókilderi Memleket basshysynyń atom energetıkasyn damytý jónindegi bastamasyn qoldap, energııa tapshylyǵy jaǵdaıynda ónerkásipti odan ári damytý jáne jańa nysandardy iske qosý úshin turaqty ári senimdi energııanyń jańa kózi qajet ekenin atap kórsetti. Osylaısha, bıyl 6 qazandaǵy atom elektr stansasyn salý jónindegi referendýmda oń sheshim qabyldanǵan jaǵdaıda elimizde aǵymdaǵy jáne keleshegi bar óndiristerdiń energetıkaǵa degen qajettilikterin jabýǵa, jańa jumys oryndaryn ashýǵa múmkindik bolady.
Kezdesýdi qorytyndylaı kele, Premer-mınıstr Prezıdent alǵa qoıǵan mindetterge qol jetkizý úshin bıznesti ekonomıkanyń naqty sektoryn damytýǵa belsendi tartý qajet ekenin atap ótti.
«Memleket basshysy elimizdi jan-jaqty jańǵyrtýdy belsendi júrgizip jatyr. Ekonomıkadaǵy ósim azamattarymyzdyń turmys sapasyn jaqsartýǵa tikeleı áser etýi kerek. Sonymen qatar iri bıznes áleýmettik jaýapkershilikti kórsetýi qajet. Prezıdent kelesi jyldy «Jumysshy mamandyqtary jyly» dep jarııalaǵanyn bilesizder. Bizde iri kásipkerler kolledjderge qamqorlyq jasap, mamandar daıarlaýǵa tıisti baza quratyn sátti úlgiler bar. Bul model sonymen qatar bızneske bolashaq kadrlardy daıarlaýǵa múmkindik beredi. «Jumysshy mamandyqtary jyly» aıasynda mundaı tájirıbeni jandandyrý qajet», dedi O.Bektenov.
Sonymen qatar aýylda kásipkerlikti damytý jáne aýyl turǵyndaryn jyl boıy jumyspen qamtý qajettigi atap ótildi. Úkimet basshysy tıisti mınıstrlikterge bıznes ókilderi tarapynan aıtylǵan, «jasyl jobalardy» nesıeleýden túsetin kiriske tómendetilgen salyq mólsherlemesin engizý, otandyq tuqym sharýashylyǵyn damytý boıynsha dıqandardy yntalandyrý sharalaryn jetildirý, otandyq analogtar bolǵan jaǵdaıda ımporttyq taýarlar men qyzmetterdi satyp alýdy azaıtý múmkindigin qarastyrý syndy usynystardy zerdeleýdi tapsyrdy.