Premer-mınıstrdiń orynbasary Tamara Dúısenova Parlament depýtattarymen kezdesý ótkizip, onda el Prezıdentiniń tapsyrmalaryn iske asyrý sheńberindegi sharalardy usyndy. Kezdesýge Oqý-aǵartý, Ǵylym jáne joǵary bilim, Eńbek jáne halyqty áleýmettik qorǵaý mınıstrleri, sondaı-aq joǵary oqý oryndarynyń basshylary qatysty.
Vıse-premer eldegi sheteldik joǵary oqý oryndary fılıaldarymen jumys isteýge nazar aýdardy. Bul baǵytta Ǵylym jáne joǵary bilim mınıstrligi bilim berý baǵdarlamalaryn, oqytý tehnologııalaryn transfertteý máselesin kóterdi. Stýdentterdiń bilim deńgeıin, quzyreti men daǵdysyn baǵalaý bóliginde olardyń jumysyna biryńǵaı talaptar qabyldaýdy josparlap otyr. Otandyq joǵary oqý oryndarynyń básekege qabilettiligin arttyrý úshin bilim berý sapasyn táýelsiz baǵalaý uıymdastyrylady. Bul rette negizgi krıterııler – Ekonomıkalyq yntymaqtastyq pen damý uıymy elderi qoldanatyn kórsetkishter. Baǵalaý nátıjeleri boıynsha joǵary oqý oryndary lıgalarǵa bólinedi.
– Jańa erejeler bilim berý granttaryn bólýge de áser etedi. Aldaǵy jyldarda granttar joǵary oqý oryndarynyń kiretin lıgasyna qaraı jáne ulttyq biryńǵaı testileýde joǵary ball alǵan, biraq konkýrs aıasynda óte almaı qalǵan túlekterdi qoldaý maqsatynda saralanady, – dedi T.Dúısenova.
Lıgalarǵa bólý kolledjder arasynda da josparlanǵan. Memleket basshysy kelesi jyldy «Jumysshy mamandyqtary jyly» dep jarııalady. Osyǵan baılanysty tehnıkalyq jáne kásiptik bilim berý uıymdary transformasııasynyń keshendi jospary daıyndalyp jatyr. Orta bilim berý sapasyn arttyrý maqsatynda óńirlerde tirek mektepter jelisin qurý, shaǵyn jınaqty mektepterdi transformasııalaý boıynsha jumys jalǵasady. Sondaı-aq jyl sońyna deıin «Jaıly mektep» jobasy aıasynda salynǵan mektepterdi basqarý júıesiniń jańa modeli bekitiledi.
– Qarjylandyrý kózderi naqtylana otyryp, aldaǵy 3 jylda 1 300 mektepti kúrdeli jóndeý jospary 1 jeltoqsanǵa deıin ázirlenedi. Memlekettik qoldaýdyń ashyqtyǵyn qamtamasyz etý úshin balalardy tárbıeleý, oqytý jáne tamaqtandyrýǵa bólinetin qarajat kólemi mobıldi qosymshada nemese ata-analardyń «Áleýmettik ámııanynda» qyzmetti naqty alý faktisine qaraı kórsetilip otyrady, – dedi vıse-premer.
Tamara Dúısenova mektepke deıingi bilim berýge qatysty josparlanyp otyrǵan sharalar týraly da aıtty. Onyń sózinshe, balabaqshalardyń bilim berý baǵdarlamalaryn mektepterdiń bastaýysh synyptarymen sınhrondaý, biryńǵaı sıfrlyq kezek jobasyn iske asyrý jumystary jalǵasady. Bul jumys zańnamaǵa ózgerister engizýdi talap etedi. Deneshynyqtyrý jáne sport salasynda da jańalyqtar bar. Atap aıtqanda, sportty damytýdyń úsh satyly júıesi qurylady. Joǵary jetistiktegi sport túrleriniń tizbesi qaıta qaralady. Osy salaǵa bólinetin qarajatty tıimdi jáne utymdy paıdalaný úshin jan basyna shaqqandaǵy qarjylandyrý normatıvi engiziledi, sport túrleri boıynsha kadrlar daıarlaý júıesi qaıta qaralady. Bul ózgerister Májiliste qaralatyn zań jobasy sheńberinde engiziledi.
Densaýlyq saqtaý salasynda da reformalar kózdelgen. Kepildendirilgen bazalyq jáne saqtandyrý paketterinen turatyn medısınalyq kómektiń biryńǵaı paketin qalyptastyrý usynylady. Ashyqtyqty qamtamasyz etý úshin sıfrlandyrý engiziledi. Jyl sońyna deıin medısınalyq saqtandyrý qoryn sıfrlandyrý boıynsha jumystardy aıaqtaý jáne kelesi jyldyń sońyna qaraı Biryńǵaı ulttyq aqparattyq júıeni engizý josparlanyp otyr. Úkimet otbasynyń sıfrlyq kartasynyń derekterine sáıkes daǵdarystyq jáne shuǵyl sanattarǵa jatqyzylǵan otbasylar sanyn azaıtý jónindegi jumysty jalǵastyrady.