Búgin Astanada ótip jatqan V Dúnıejúzilik kóshpeliler oıyndarynyń saltanatty jabylý rásimi ótedi. Uıymdastyrýshylar atalǵan is-sharaǵa kórermender úshin bılet satylmaıtynyn eskertti, dep habarlaıdy Egemen.kz.
Búgin, 13 qyrkúıek kúni V Dúnıejúzilik kóshpeliler oıyndary máresine jetedi. Osy jyldyń kókteminde bıýdjettiń qysqarýyna baılanysty dúbirli dodanyń jabylý rásimi hattamalyq formatta ári kórermendersiz ótedi. Alaıda aıtýly is-sharany otandyq telearnalardyń tikeleı efırinen tamashalaýǵa bolady.
«Kóshpeliler oıyndardyń jabylý saltanatyna bılet satylyp jatqany týraly aqparat tarap júr. Kez kelgen jalǵan aqparat alaıaqtyq bolyp sanalady. El azamattary men shetelden kelgen qonaqtardy abaı bolýǵa shaqyramyz. Kúmándi usynystarǵa aldanyp qalmańyzdar. Oıyndardyń jabylý rásimine tek sportshylar qatysady», deıdi uıymdastyrýshylar.