«Katonqaraǵaıda áýejaı salynady» degen jańalyqty resmı jıyndarda estip kele jatqanymyzǵa on jyldan asty. Keıingi jyldary el bul aqparatqa nazar aýdarýdy da qoıǵan. Kúni keshe Prezıdent Qasym-Jomart Toqaev Katonqaraǵaı men Zaısan aýdandarynda týrızmniń áleýetin durys paıdalaný qajet ekendigin aıta kelip, qos aýdanǵa áýejaı salynady degendi estigen el, shyn qýandy. Sebebi Memleket basshysynyń aýzynan shyqqan sózdiń oryndalaryna kózderi jetken.
«Katonqaraǵaı, Zaısan jáne Kendirli óńirleriniń de týrıstik áleýetin durys paıdalaný qajet. Osyndaı demalys aımaqtarynda sapasy joǵary jol ınfraqurylymy bar áýe beketteri men áýejaılar salý kerek», dedi Prezıdent Qasym-Jomart Toqaev. Bul sózdi estigen Katonqaraǵaı, Zaısan, Tarbaǵataı turǵyndary bir-birinen súıinshi surasyp, qutty bolsyn aıtysyp ketken. Mynaý qarbalasqan zamanda aýdandarǵa ushaqtyń ushýy kópshiliktiń qolyn edáýir uzartady. Eń bastysy, tabıǵaty ásem óńirlerge baratyn týrısterdiń sany eselenedi. Berel qoryq-mýzeıiniń dırektory Almas Sarbasovtyń aıtýynsha, endi lek-legimen keletin týrısterdi qabyldap, sapaly qyzmet kórsetilýge tıis.
– Bizdiń mýzeıge maýsymynda 11 myńdaı týrıst kelip, tamashalaıtyn. Endi áýejaı salynyp, úlken áýe kemeleri qatynaıtyn bolsa, bul san eselenedi. Sondyqtan mýzeıler men týrıstik ortalyqtar qyzmet kórsetýdi jetildirýi kerek. Týrıstik operatorlar da jaýapkershilikti sezinedi. Týrıster ushaqpen kelgendikten, olarǵa munda qatynap turýy úshin kólik qajet. Demek jergilikti jurt olarǵa qyzmet kórsetedi. Qarapaıym tilmen aıtsaq, tirshilik qaınaı túsedi, – deıdi Berel qoryq-mýzeıiniń basshysy Almas Sarbasov.
Iá, áýejaı ashylyp, joldar jóndelse, týrızm men kásipkerlik sózsiz damıdy. Jergilikti turǵyndarǵa tek erinbeı eńbek etý kerek. Olarǵa memleket tarapynan beriletin túrli jeńildikterdiń bary da ras. Der kezinde paıdalana bilse, bolǵany.
– Áýejaı salynady degendi Prezıdent aýzynan estip, qýanyshymyz áýelep ketti. Ol degen aýdanymyzdyń damýyna úlken serpin beredi. Aýdan ashylǵanda qalaı qýansaq, búgin solaı qýanyp jatyrmyz, – deıdi Katonqaraǵaıdyń turǵyny, ardager sportshy Qabdol Mámıev.
Dál osylaı Tarbaǵataı turǵyndary da alaqaılap júr. Zaısan aýdanynda ashylatyn áýejaıǵa olar nege malaqaılaryn aspanǵa atty deımiz ǵoı. Sóıtsek, kórshiles aýdannyń áýejaıyna Tarbaǵataı aýdanynyń ortalyǵy Aqjardan 30-40 mınýtta jetip barýǵa bolady eken.
– Memleket basshysynyń Joldaýyn tyńdap otyryp, Zaısan aýdanynda áýejaıdyń boı kóteretinin aıtqanda, tóbemiz kókke jetkendeı boldy. Sebebi bizge jaqyn. Myna turǵan jer. Qalalyq jerde de áýejaıǵa jarty saǵat, keıde bir saǵat júrip barady. Al bizge jarty-aq saǵattyq jerge ushaq qonady. Bul jańalyqty buǵan deıin estisek te, arǵy jaǵymyzda kúmán bolǵan. Prezıdent aıtqan soń anyq kózimiz jetti. Senim bildirip otyrǵanymyz, Qasym-Jomart Toqaev Kúrshimge kópir salynsyn dedi me, áne, jeltoqsanda ashylady. Eldiń elý jyldan beri sheshilmeı kele jatqan máselesin bir-aq sátte sheshken Memleket basshysyna myń alǵys, – deıdi Tarbaǵataı aýdanynyń turǵyny Gúlnur Bolatova.
Áleýmettiń áýelgi armany – áýejaı Joldaýda aıtyldy. Halyq qýandy. Endigi másele – qurylysy qashan bastalady? Bul suraqty Jolaýshylar kóligi jáne avtomobıl joldary basqarmasynyń basshysy Nurjan Jumadilovke qoıdyq.
– Eki áýejaı boıynsha naqty tapsyrma berildi. Jumystar 2025 jyldyń kóktemine qaraı bastalady. Ushý alańdarynyń uzyndyǵy 2100 metr bolady. Jobalaý jumystary bastalmas buryn topografııalyq aerotúsirilim jasalady. Aıta keteıin, zertteý nátıjesinde Katonqaraǵaı aýlynyń ózinde ushaqtardyń ushyp-qonýy qolaısyz bolsa, Soldatov aýlynyń tusyndaǵy jazyqty qarastyramyz. Al Zaısan aýdany boıynsha Sátbaı aýlyndaǵy eski áskerı áýejaıdyń ornyn qarastyrdyq. Ol Tarbaǵataı aýdany turǵyndaryna da jaqyn bolmaq. Marqakól aýdanyna da tıimdi. Sonymen qatar áýejaıdyń jumys isteý kestesi, mamandardy jumysqa tartý máselesi de quzyrly organdardyń nazarynda bolady, – deıdi N.Jumadilov.
Aıtqandaı, Omby – Maıqapshaǵaı tasjolynyń qurylysy aıaqtalýǵa jaqyn. Demek shekaradan shyqqan júkti tikeleı ushaqpen basqa qalalarǵa týra ári jedel jetkizýge bolady. Iá, bul – jekelegen aýdandarǵa ǵana emes, jalpy Shyǵys Qazaqstanǵa qatynaýdyń ońtaıly joly.
Shyǵys Qazaqstan oblysy