Halyq qaharmany – «Qazaq gazetterinde»

Seriktestiktiń bas dırektory Dıhan Qamza­bekuly Sát Besimbaıulyn Mem­leket basshysy Qasym-Jomart Toqaevtyń qolynan alǵan eń joǵary marapatymen quttyqtap, «Halyq qaharmany» ataǵy kezekti márte óz ıesin tapqanyn tilge tıek etti. Kezdesý barysynda qadirmendi qonaqtyń elimizdiń táýelsizdik alǵannan keıingi eń alǵashqy qıyn jyldarda, eń jaýapty laýazymdarda qyzmet etkeni áńgime arqaýyna aınaldy. Aıaǵynan táı-táı basqan jas memlekettiń ulttyq qaýipsizdik salasyn, odan keıin qorǵanys salasyn basqarý, ony jańa deńgeıge shy­ǵarý tek qabiletti de qarymdy adamnyń ǵana qolynan keletin. Sát Besimbaıuly el basshylyǵy júktegen osy tapsyrmalardyń údesinen shyǵyp, qolyna qandaı qyzmetti ustasa da, áp degennen úıirip áketip otyrdy. 

«Siz Qorǵanys mınıstri bolyp taǵaıyndalǵan kezde 1992-1993 jyldary bastalǵan aýyrtpalyq áli de ásker salasyna salmaǵyn salyp turǵan edi. Sonyń bárine qaramaı qıynnan qıystyryp jol taýyp, qorǵanys salasyna birqatar reforma júrgizdińiz. Sizdiń uıytqy bolýyńyzben eldiń ishki jalpy óniminiń 1 paıyzy qorǵanys salasyna jumsalatyn boldy. Sol jyldary ýaqyt talabyna jaýap beretin ekinshi Áskerı doktrına qabyldandy. Osyndaı súbeli eńbekterińizdiń bári búgingideı úlken marapat ıesi atanýyńyzǵa septigin tıgizgenine shúbá joq», dedi Dıhan Qamzabekuly.

Sát Toqpaqbaev óz kezeginde eli­mizdiń barlyq salasynda bolyp jatqan eleýli jańalyqtardy qalt jibermeı, halyqqa jetkizip otyr­ǵan «Egemen Qazaqstan» jáne «Kazahstanskaıa pravda» gazetteri redaksııasyna kelýi de bekerden emes ekenin jetkizdi. «Baspasóz – árbir memleket úshin áskerı tehnıkadan kem túspeıtin qarý. Jýrnalıster – sol maıdandaǵy sarbazdar. Sizderdiń jasap jatqan eńbekterińiz zor. Elimizdiń qorǵanys jáne ulttyq qaýipsizdik salasyndaǵy barlyq jańalyq pen jetistikterdi nasıhattap kelesizder. Búgingi alyp jatqan marapatyma oraı qýanyshymdy sizdermen de bóliskendi jón kórip, arnaıy kelip otyrmyn», dedi Halyq qaharmany.

Kezdesý sońynda Sát Besimbaıuly redaksııa ujymymen estelik sýretke tústi.