Atalǵan oqıǵa Almaty kósheleriniń birinde bolǵan. Jol-kólik oqıǵasy saldarynan egde jastaǵy er adam dene jaraqatyn alǵan, dep habarlaıdy Egemen.kz.
Jol apaty bolǵan jerde túsirilgen vıdeo áleýmettik jelide tarap júr. Vıdeo kadrlarynda avtobýstyń astynda qalǵan zeınetker men oǵan kómektesýge tyrysyp jatqan adamdar beınelengen.
Qalalyq polısııa departamenti bul jaǵdaıǵa qatysty túsinikteme berdi. Polıseılerdiń habarlaýynsha, jol apaty 17 qyrkúıek kúni saǵat 13:30-da Bostandyq aýdanynda bolǵan.
«Avtobýs júrgizýshisi Tımırıazev kóshesimen shyǵys baǵytta kele jatyp, solǵa burylǵan kezde 1947 jyly týǵan er adamdy basyp ketken. Ol jol bóligin batys baǵytta belgisiz jerde kesip ótti. Jol-kólik oqıǵasy saldarynan jaıaý júrginshi dene jaraqatyn alyp, aýrýhanaǵa jatqyzyldy. Apat faktisin tergeýge Bostandyq aýdandyq polısııa basqarmasynyń qyzmetkerleri kiristi», delingen habarlamada.
Al qalalyq qoǵamdyq densaýlyq saqtaý departamenti zardap shekken zeınetkerdiń Ortalyq qalalyq klınıkalyq aýrýhanaǵa jetkizilip, oǵan shuǵyl ota jasalǵanyn habarlady.
«Qazirgi ýaqytta naýqastyń jaǵdaıy aýyr dep baǵalanyp otyr. Naýqas jansaqtaý bóliminde jatyr, ol dárigerlerdiń turaqty baqylaýyna alynǵan», dep habarlady qalalyq densaýlyq saqtaý basqarmasynan.