Otandyq kolledj stýdentteri «WorldSkills-2024» jumysshy mamandyqtarynyń álemdik chempıonatynda 7 medalon jeńip aldy. Fransýz qalasy Lıonda ótken «WorldSkills Lyon-2024» 47-halyqaralyq kásibı sheberlik saıysyna 69 elden 1500-ge jýyq kolledj stýdenti qatysty. Byltyr Qazaqstan quramasy Gdansk qalasynda ótken «EuroSkills» chempıonatynda 2 medal jáne 4 medalon jeńip alǵan edi. Bıylǵy iri jarysta nátıje aıtarlyqtaı jaqsarǵan.
Oqý-aǵartý mınıstrliginiń taratqan aqparatyna súıensek, elimizdiń namysyn 30 quzyrettilik boıynsha 32 qatysýshy jáne 30 halyqaralyq sarapshy qorǵady. «Ult úzdigi» atalymy jáne quzyrettilikter boıynsha úzdikter: Oral aqparattyq tehnologııalar kolledji «Veb-tehnologııalar» mamandyǵynyń stýdenti Rýslan Iýsýpov; Shymkent qalasynyń jeńil ónerkásip jáne servıs kolledji «Sán tehnologııasy» mamandyǵynyń stýdenti Áıgerim Dosova; Qostanaı avtomobıl kóligi kolledji «Jelilik jáne júıelik ákimshilendirý» mamandyǵynyń stýdenti Danııar Ábikenov; Almaty qurylys-tehnıkalyq kolledji «Qurǵaq qurylys jáne sylaq jumystary»mamandyǵynyń stýdenti Mıhaıl Popov; Semeı qalasynyń Radıotehnıka jáne baılanys kolledji «Mobıldi robottehnıka» mamandyǵynyń stýdentteri Tımýr Babenko men Elnar Jýasbaev; Almaty qalasy «Ádilet» kolledji «Qonaqúı resepshıonısi» mamandyǵynyń stýdenti Janel Saǵyndyq; Pavlodar servıs jáne tamaqtaný kolledji «Meıramhana servısi» mamandyǵynyń stýdenti Artýr Leıman.
Oqý-aǵartý mınıstri Ǵanı Beısembaev joǵarydaǵy jeńimpazdardy arnaıy qabyldap, quttyqtaýyn jetkizip, tolaıym tabystar tiledi. Onyń aıtýynsha, stýdentterdiń bul nátıjesi erekshe atap aıtýǵa turarlyq qýanysh.
«Memleket basshysynyń Joldaýynda aldaǵy jyldy «Jumysshy mamandyqtary jyly» dep jarııalaýy mundaı jeńistiń mańyzyn arttyra túsedi. Eńbek adamynyń bedelin arttyrý maqsatynda bıylǵy qyrkúıek aıynan bastap 300 myńnan asa kolledj stýdentiniń shákirtaqysy 50%-ǵa artty, al memlekettik tapsyrys kólemi 12 myń orynǵa ulǵaıdy. «WorldSkills» standarttary bilim baǵdarlamalaryna engizildi. Jeńimpaz stýdentterdi, olardyń pedagogteri men ata-analaryn shyn júrekten quttyqtaımyn! Sizderdiń jetistikterińiz elimizdiń damýy jolyndaǵy jańa kásibı belesterińizdiń negizine aınalatynyna senimdimin!», dedi mınıstr.
«WorldSkills International» – 25 jasqa deıingi jas mamandardyń kásibı daǵdylaryn anyqtaýǵa, damytýǵa baǵyttalǵan iri halyqaralyq jarys. Chempıonat halyqaralyq yntymaqtastyqty nyǵaıtýǵa jáne sıfrlyq transformasııa jaǵdaıynda jumysshy mamandyqtary men zamanaýı tehnıkalyq bilimniń mańyzyn arttyrýǵa, sonymen qatar búkil álem boıynsha tehnıkalyq mamandyqtar boıynsha kásibı daıarlyqtyń mártebesin, standarttaryn nasıhattaýǵa baǵyttalǵan. Al chempıonatqa qatysý oqý baǵdarlamalaryn jaqsartýǵa, zamanaýı standarttardy engizýge, tehnıkalyq jáne kásiptik mamandyqtarǵa jastardy tartýǵa yqpal etedi. Búgingi tańda atalǵan halyqaralyq qozǵalys 85 elde kásibı daıarlyq standarttaryn arttyryp, onyń qoldaýymen óńirlik, ulttyq jáne álemdik chempıonattar, kontınenttik birinshilikter ótkizilip keledi. Qazaqstan 2014 jyldan bastap «WorldSkills»-tiń tolyqqandy múshesi sanalady, bul jańa talaptarǵa sáıkes tehnıkalyq jáne kásiptik bilim berý kadrlaryn daıarlaýdyń ulttyq júıesin qaıta qaraýǵa negiz boldy.
«WorldSkills-2024» chempıonatynyń qatysýshysy, Qazaqstan qurama komandasynyń múshesi ári «Ult úzdigi» atalymynyń ıegeri Artýr Leıman halyqaralyq jarys úlken tájirıbe jınaýǵa múmkindik bergenin aıtady. «Biz jarys aldynda ózge de elderden kelgen qatysýshylarmen tanysyp, aralasyp, tájirıbe almasýǵa múmkindik aldyq. Mysaly, men saıysqa túsken «Meıramhana servısi» baǵyty boıynsha 6 elden kelgen qarsylastarym boldy. Olardyń da qarym-qabiletin kórdik. Jańa nárse úırendik. Uıymdastyrýshylar óte joǵary deńgeıde daıyndalǵan. Jarysty uıymdastyrý tarapy túsindirgendeı, men jarys nátıjesinde eń joǵary ball jınaǵan komanda múshesi boldym. Sondyqtan meni «Ult úzdigi» atalymy boıynsha jeńimpaz dep tanydy», deıdi.
Al «Qonaqúı resepshıonısi» quzyrettiligi boıynsha el namysyn halyqaralyq jarysta qorǵaǵan Janel Saǵyndyq: «О́z baǵytymda jeńimpaz atanyp, Fransııa elinen medalonmen oraldym. Bul – meniń álemdik arenadaǵy alǵashqy tájirıbem. Buǵan deıin el kólemindegi respýblıkalyq baıqaýlarda óner kórsetip keldim. «WorldSkills» chempıonaty maǵan kásibı damýyma úlken serpilis berdi. Fransııa, Shvesııa elderinde qonaqúı sharýashylyǵy óte jaqsy damyǵan. Sheteldik áriptestermen, óner kórsetýshilermen tájirıbe almasyp, kóp jańa dúnıe bildim. Oǵan qosa jańa dostar taptym. Bárinen de chempıonat Fransııaǵa barsam degen armanymnyń oryndalýyna sebepker bolǵanyna, elimdi halyqaralyq deńgeıde kórsete alǵanyma, júldemen oralǵanyma baqyttymyn!», dep qýanyshyn bólisti.