Búgingi kúnge deıin Taıaý Shyǵys elderinen jalpy alǵanda 10 275 Qazaqstan azamaty elge qaıtaryldy, dep habarlaıdy Egemen.kz.
Syrtqy ister mınıstrliginiń málimetinshe, Qazaqstan azamattaryn evakýasııalaý ártúrli baǵyttar arqyly, onyń ishinde áýe jáne qurlyq joldarymen júzege asyryldy.
Qazaqstan Respýblıkasynyń óńirdegi dıplomatııalyq ókildikteri jergilikti jerlerde shet memleketterdiń quzyretti organdarymen ózara is-qımyldy úılestirip, otandastarmen turaqty baılanysta bolyp, Qazaqstan azamattaryna qajetti kómek kórsetti.
Eske sala keteıik, Izraıl 28 aqpanda tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı qalǵan. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Buǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.