Shyǵys óńirindegi tarıhı qundy jádigerlerdiń deni Berel-qoryq mýzeıiniń qorynda saqtalǵan. Sonyń biri – túrki dáýirine tıesili Qaraqaba qorymynan tabylǵan beldiktiń japsyrmasy.
Qaraqaba qorymy Katonqaraǵaıdan Marqakól óńirine asa beristegi taý basyndaǵy keń jazıra jazyqta. Jazyqtyń bir búıirinen Qaba ózeni jylystap, Marqakólge quıady. Taý bıigindegi jazyqpen Shyǵysqa tike tartsań, Qytaı men Reseıdiń shekarasyna tirelesiz. Mańdaı tusyńyzdan Hrýstal shoqysy jarqyraıdy. Osydan bastap Sarymsaqty jotasyna deıingi atyrap Tarbaǵataı dep atalady. Berel mýzeıinde turǵan beldiktiń japsyrmasy týra osy tustaǵy qazba jumystarynan tabylǵan. Ataqty arheolog Zeınolla Samashev júrgizgen Qaraqaba qorymynan tabylǵan qundy jádigerler az emes.
№9 qorǵanda jerlengenderdiń qorǵanysh quraldarynyń beldikteri arnaıy japsyrmalarmen áshekeılenipti. Adam basy beınelengen japsyrmanyń shetteri dóńgelengen, úlken tórtburyshty sańylaýlary bar. Kózdiń, murynnyń, qastyń, aýyzdyń, qulaqtyń erekshelikteri egjeı-tegjeıli óńdelgen. Áshekeı altyn jalatylǵan kúmis metaldan jasalypty.
Berel-qoryq mýzeıiniń qor saqtaýshy mamany Janat Erlanqyzynyń aıtýynsha, beldiktiń altyn tústi japsyrmasy túrki dáýirindegi jaýyngerdiń birine tıesili bolǵan. О́lshemi – 2,5 santımetr. Tarıhqa, arheologııaǵa qyzyqqan oqyrman bul jádigerdiń túpnusqasyn Katonqaraǵaı aýdany aýmaǵynda ornalasqan Berel-qoryq mýzeıinen kóre alady. Bul jádigerden basqa da myńdaǵan arheologııalyq olja bar.