Oblys ortalyǵyndaǵy halyq kóp qonystanǵan aýdanda 1200 oryndyq jańa mekteptiń ashylýy qala kúnine tuspa-tus keldi. Rasynda da bul mektep jetispeýshiligine oraı týyndaıtyn máseleni sheshýge kómektesken keremet syılyq boldy, dep habarlaıdy Egemen.kz.
KAZ Minerals Toby quny 9,2 mlrd teńgeni quraıtyn ǵalamat jobany salystyrmaly túrde óte qysqa merzimde iske qosqan.
Jańa bilim ordasynda 48 oqý kabıneti bar. Onyń ishinde: 6 ınformatıka, 6 mýltımedııa, 6 jalpy pánderge arnalǵan (hımııa, fızıka, bıologııa) kabınetter, robototehnıka, grafıka men modeldeý bólmeleri, tokarlyq-slesarlyq sheberhana, ustahana, aspaz bólmesi, tigin kabıneti t.b bolyp bólinedi. Sonymen qatar mektepte 280 oryndyq májilis zaly men 420 oryndyq ashana qarastyrylǵan.
Ǵımarat ishinde bir úlken sport zaly men bastaýysh mektep oqýshylary úshin shaǵyn oıyn zaly jasaqtalǵan. Odan bólek mektep aýmaǵynda fýtbol, voleıbol, basketbol alańdary men júgirý jolaǵy jáne demalys pen oqýǵa arnalǵan basqa da ınfraqurylymdar ornalasqan.
Mektep qurylysyn jobalaý kezinde jáne jumys barysynda barlyq zamanaýı talaptar, atap aıtqanda qımyl-qozǵalysy shekteýli jandardyń qajettiligi de eskerildi. Munda 4 pandýs, ǵımarattyń ishi men syrtynda taktıldi júrý jolaǵy jáne 2 lıft iske qosylǵan.
«Mektep 1200 oryndyq, al biz 1425 oqýshyny qabyldadyq. Sol sebepti eki aýysymdyq oqytý júıesin qarastyryp jatyrmyz. Mektepke deıingi daıyndyqtan ótkizetin eki top ashý da josparda bar. Oblys ortalyǵyna Qala kúnine arnap osyndaı keremet syı jasaǵan KAZ Minerals Tobyna alǵysymyz sheksiz. Kompanııa qurylys jumysynan bólek, sheberhanalar men robototehnıka jáne ınformatıka kabınetterin jasaqtap berdi. Oqý bólmelerinde ınteraktıvti taqtalar ornatylǵan. Kompanııa mektepke sapasy joǵary jıhaz satyp aldy. Onyń barlyǵy qazaqstandyq ónim», dedi №50 IT-mektep-lıseıi dırektorynyń mindetin atqarýshy Nartaı Sholtyqov.
Mekteptiń ashylýymen 100-den asa jańa jumys orny paıda boldy. Tamyzda muǵalimder úshin konkýrs jarııalanyp, oǵan qatysqan 300 shaqty úmitkerdiń arasynan 88 oqytýshy irikteýden ótken edi. Odan bólek basqa mektepterden 40 ustaz aýysyp keldi. Solaı bola tura lıseıge áli de ınformatıka, matematıka, fızıka pánderiniń oqytýshylary jetispeýi sebepti qosymsha konkýrs jarııalanatyn boldy.
Mektep qurylysyna otandyq merdiger uıymdar tartylyp, jumystyń basym bóliginde otandyq óndirýshiler shyǵarǵan materıaldar paıdalanyldy.
«Bizdiń kompanııa áleýmettik baǵytty ustanady, sol sebepti áleýmettik salany damytýǵa qomaqty qarjy jumsaımyz. Bul baǵyttaǵy barlyq jumys jergilikti atqarýshy bılikpen talqylanyp, aımaqqa qajetti jobalar jáne olardyń tıimdiligi taldanady. Sondaı jobalardyń biri – zamanaýı mektep qurylysy. Munda joǵary deńgeıdegi ınformatıka jáne robototehnıka kabınetteri, keń májilis zaly men ashana, sport zaldary men ashyq alańdar jasaqtaldy. Sonymen qatar shákirtterdiń sabaqtan tys áńgimelesip, shyǵarmashylyqpen aınalysýyna qolaıly netvorkıng aımaǵy bar. Biz bul mekteptiń suranysqa ıe bolyp, uly Abaıdyń otanynda bilim deńgeıin jańa satyǵa kóterip, Semeıdiń maqtanyshyna aınalatynyna senimdimiz», dep málimdedi KAZ Minerals Demeu korporatıvtik qorynyń dırektory Rýslan Qasenov.
Mekteptiń ashylý saltanatyna qatysqan Abaı oblysynyń ákimi Nurlan Uranhaev oqý kabınetterin aralaı júrip, zamanaýı mekteptiń jańa ashylǵan «Zarıa» aýdanynyń gúldenýiniń alǵashqy nyshany ekenin atap ótti.
«Bizde buryn mundaı mektep bolǵan emes. Alda áli talaıy turǵyzylady, biraq bul mektep - solardyń alǵashqysy. Qalada Kongress-holl, stadıon turǵyzylyp jatyr. Eski úılerdiń ornyna tutas jańa aýdan paıda bolady. Birden aıta keteıin – tarıhı ǵımarattarǵa eshkim tıispeıdi. Erteń jańa úılerdiń terezesinen birden Ertiske kóziń túsedi, bul óte keremet kórinis bolmaq», deıdi Nurlan Uranhaev.
Ekinshi synypta oqıtyn Aıbyn Dúısenhanov ata-anasynyń ózin jańa oqý jylynda jańa mektepke aýystyrǵanyna qýanyshty. Balaqaı robototehnıka pániniń bastalǵanyn asyǵa kútip júr. Ol robotehnıka kabınetindegi jabdyqtarmen jumys isteýdi kópten armandaǵanyn jasyrǵan joq.
«Semeıdegi oqý ornynyń tapshylyǵy 5000-nan asady. Jańa mektepte 1415 bala oqıdy. О́ńirde «Jaıly mektep» Ulttyq jobasynyń aıasynda taǵy eki mektep salynyp jatyr. Osylaısha biz aımaqtaǵy oqý ornynyń jetispeýshiligin azaıtamyz», dedi Semeı qalasy bilim bóliminiń basshysy Serjan Býlabaev.
Jańa mektep jaıly áserimen bóliskenderdiń biri - eki oqýshynyń anasy Madına Namazaqova.
«Biz de osynda aýystyq. Buǵan deıin balalarym eki túrli mektepte oqydy. Meni qýantatyny – sabaqtar eki tilde oqytylady. Bir balam qazaq synybyna, ekinshisi orys synybyna barady. Mekteptiń taǵy bir basymdyǵy – akademııalyq bilimnen bólek, IT salasyn tereńdetip oqytatyndyǵynda. Bul salanyń bizdiń ómirimizde alar orny erekshe. Sonymen qatar, qaýipsizdik máselesine de basa kóńil bólingen. Ǵımarat aýmaǵy tolyǵymen beınebaqylaýda. Arnaıy ótkizý júıesi bar. Taǵy bir atap ótetini – zamanaýı robotehnıka men ınformatıka kabınetteri», deıdi Semeı turǵyny Madına Namazaqova.
Kompanııa ókilderi mektep qurylysynyń KAZ Minerals Tobynyń básekege qabiletti, tıimdiligi joǵary adamı kapıtaldy damý jolyndaǵy uzaq merzimdi basym maqsattaryn júzege asyrýdaǵy jańa kezeń ekenin atap ótti. Kompanııa sońǵy jyldary aımaqtaǵy joǵary jáne orta bilim berý mekemelerimen áriptestik ornatý arqyly otandyq bilim berý salasyna qoldaý kórsetip keledi. Jyl saıyn talantty túlekterge granttar bólinip, kompanııanyń kásiporyndarynda jalaqysy tólenetin kásibı tájirıbeden ótýge múmkindik beriledi jáne jergilikti turǵyndardy jańa kásipke baýlý baǵdarlamalary júzege asyrylýda. Jańa mekteptiń ashylýy arqyly bul prosess orta bilim berý salasyn da qamtydy deýge negiz bar.