QR Izraıl memleketindegi Elshiligi Taıaý Shyǵystaǵy jaǵdaıdyń ushyǵýyna baılanysty Qazaqstan azamattaryna úndeý joldap, birqatar usynys berdi, dep habarlaıdy Egemen.kz elshiliktiń baspasóz qyzmetine silteme jasap.
«Taıaý Shyǵystaǵy jaǵdaıdyń ushyǵýyna baılanysty Qazaqstannyń Tel-Avıvtegi Elshiligi Izraıldegi barlyq Qazaqstan azamatyna qaýipsizdik sharalaryn barynsha kúsheıtýdi, saqtyq pen qyraǵylyq tanytýdy, sońǵy jańalyqtardy qadaǵalaýdy, sondaı-aq Qazaqstan Elshiligimen baılanysta bolýdy suraıdy», delingen úndeýde.
Sondaı-aq Izraıldegi Qazaqstan azamattary úshin jedel jeli iske qosyldy.
Qazaqstannyń Izraıldegi Elshiliginiń baılanys nómirleri:
+972 (3) 503 78 85 (kezekshi); +972 53 635 19 83 (uıaly telefon, WhatsApp); +972 55 273 38 13 (uıaly telefon, WhatsApp); +7 700 111 31 96 (WhatsApp).Aıta keteıik, 2024 jyldyń 1 qazanyna qaraǵan túni Izraıl armııasy Lıvannyń ońtústiginde qurlyq operasııasy bastalǵanyn málimdedi. Keıin Iran Izraılge qaraı 500-ge jýyq zymyran ushyrǵany habarlanǵan edi. SAHAL ókili Danıel Hagarı zymyrandardyń bir bóligi atyp túsirilgenin aıtty.
Foto: AFP
Izraıl Syrtqy ister mınıstrligi bul oqıǵany qatań aıyptap, beıbit turǵyndarǵa shabýyl jasalǵanyn alǵa tartty.
Aıta keteıik, búgin 2 qazanda QR Syrtqy ister mınıstrligi de Taıaý Shyǵystaǵy jaǵdaıǵa qatysty shuǵyl málimdeme jasady.
«Biz beıbit turǵyndardyń qazasy men jaǵdaıdyń odan ári nasharlaýyna jol bermeý maqsatynda barlyq qatysýshy taraptardy sabyrlylyq tanytyp, kúsh qoldanýdan bas tartýǵa shaqyramyz. Osyǵan baılanysty, kelispeýshilikterdi BUU Jarǵysy men halyqaralyq quqyq qaǵıdattary aıasynda tek saıası-dıplomatııalyq joldarmen sheshý úshin jedel sharalar qabyldaýdyń mańyzdylyǵyn atap ótemiz», dep málimdedi vedomstvonyń baspasóz hatshysy Aıbek Smadııarov.