Bıyl qazannan bastap ishki saýda sýbektilerine arnalǵan memlekettik qoldaý sharalaryn usyný bastalady. Respýblıkalyq bıýdjettik komıssııanyń sheshimimen osy maqsatta 4 mlrd teńge bólinbek.
Saýda jáne ıntegrasııa mınıstrliginiń habarlaýynsha, memlekettik qoldaý sharalary 2 tásil arqyly kórsetiledi. Birinshici – nesıe mólsherlemesin sýbsıdııalaý, ekinshisi – nesıege kepil bolý. Qoldaý saýda bazarlaryn jańǵyrtý, saýda nysanyn salý, keńeıtý, rekonstrýksııalaý, úı janynan dúken salý ári osy salalarda IT-baǵdarlamalardy jasaý baǵytyna kórsetiledi.
Baǵdarlamaǵa 3 megapolıstegi saýda sýbektileri men oıyn-saýyq ortalyqtary qatysa almaıdy.
Saýda komıtetiniń tóraǵasy Aıdar Ábildabekovtiń aıtýynsha, qoldaý alǵan ishki saýda sýbektisi saýda sóresiniń 20 paıyzyn otandyq azyq-túlik óndirýshilerdiń úlesine berýi kerek. Ishki saýda erejesinde kórsetilgen «saýda sóresiniń 30 paıyzy otandyq azyq-túlik ónimderin óndirýshilerdiń úlesine berilýi kerek» degen mindettemeni qosatyn bolsa, bul kólem 50 paıyzǵa jetedi. Sondaı-aq qoldaý alǵan ishki saýda sýbektisi saýda sóresiniń taǵy 20 paıyzyn sheteldik azyq-túlik óndirýshileriniń úlesine berýi qajet.
Baǵdarlama shartyna sáıkes saýda nysandaryna qatysty jobalaryn oblys ortalyqtarynda júzege asyratyn jeke kásipkerge beriletin maksımaldy soma – 3 mlrd teńge. Jobany monoqalada nemese aýyldyq eldi mekenderde júzege asyrýshylarǵa beriletin maksımaldy soma – 1,5 mlrd teńge. Investısııalyq maqsatqa arnalǵan jobalardy sýbsıdııalaý merzimi – 5 jylǵa deıin, aınalym qarajatyn tolyqtyrý maqsatynda sýbsıdııalaý merzimi 3 jylǵa deıingi merzimdi quraıdy.