Elordada 2024 jylǵy 2-4 qazan aralyǵynda stýdenttik kásipkerlikti damytýǵa arnalǵan «Enactus World Cup 2024» álem chempıonaty ótti, dep habarlaıdy Egemen.kz aqparat agenttigi.
Bul shara stýdenttik kásipkerlikti damytý, ınnovasııalyq jobalardy tanystyrý jáne halyqaralyq baılanystardy nyǵaıtý maqsatynda uıymdastyryldy. Enactus — tek jańa ıdeıalardy kórsetý alańy ǵana emes, sondaı-aq ár eldiń stýdentterine tájirıbe almasý jáne dostyq qarym-qatynastar ornatý múmkindigin beretin platforma.
Bul jolǵy chempıonatqa 33 elden kelgen komandalar qatysyp, óz jobalaryn qorǵady. Saıys nátıjesinde 16 úzdik komanda iriktelip alynyp, tórt lıgaǵa bólindi. Qazaqstannyń namysyn qorǵaǵan «Enactus Kazakhstan» komandasy da osy úzdikter qatarynda boldy, olar óz jobalaryn kórsetip, jarqyn ıdeıalaryn usyndy.
Sharanyń jabylý saltanatyna QR Ǵylym jáne joǵary bilim mınıstri Saıasat Nurbek arnaıy qatysyp, stýdentterdiń jetistikterin atap ótti. Ol I.Jansúgirov atyndaǵy Jetisý ýnıversıteti stýdentteriniń jobasyna joǵary baǵa berip, olardyń ıdeıalary men bastamalaryn qoldaıtynyn aıtty.
Chempıonattyń fınalynda Marokko, Koreıa, Týnıs jáne Germanııa komandalary baq synap, nátıjesinde birinshi oryndy Týnıs komandasy jeńip aldy. Olardyń jobasy ınnovasııalyq sheshimderimen erekshelendi jáne halyqaralyq deńgeıde joǵary baǵalandy.
Bul chempıonat stýdentterdiń kásipkerlik daǵdylaryn damytýǵa, startap ıdeıalaryn iske asyrýǵa jáne álemdik naryqta básekelestik qabiletin arttyrýǵa múmkindik berdi. Sonymen qatar Enactus platformasy arqyly jastardyń kreatıvtilik qabiletterin shyńdap, olardy halyqaralyq deńgeıde tanytýǵa jol ashyldy.