Qytaı ǵalymdary Mars atmosferasynan qýat alatyn batareıa jasap shyǵardy.
Jańa akkýmýlıator Mars atmosferasyndaǵy elementterdi paıdalana otyryp, energııa óndire alady. Batareıa qorshaǵan ortadan kómirqyshqyl gazyn, ottegi men kómirtek totyǵyn sińire alatyndyqtan, Jerden jetkiziletin jabdyqtyń salmaǵyn azaıtýǵa múmkindik beredi. Bul – Mars logıstıkasyndaǵy mańyzdy qadam. Innovasııalyq ónim kún panelderi men atom energııa kózderinen sondaı-aq Marstaǵy resýrstardan da qýat alady.
80 jastaǵy álem arýy
80 jastaǵy Chhve Sýn Hva «Álem arýy» baıqaýynyń fınalısi atanyp, jurtty tańǵaldyrdy.
Sulýlyq baıqaýlaryna ádette 30-ǵa tolmaǵan, symbatty úmitkerler ǵana tańdalyp alynady. Alaıda Ońtústik Koreıa «Álem arýy» baıqaýynyń erejelerine ózgeris engizip, keıbir shekteýdi alyp tastaǵan. Sonyń arqasynda 3 nemeresi bar áje baıqaýdyń irikteýinen ótip, fınalǵa deıin jetken.
Júrek talmasyn anyqtaǵysh
Jasandy ıntellekt kóp salada senimdi járdemshige aınaldy. Bul joly amerıkalyq zertteýshiler neırojeliniń kómegimen ınfarkt belgisin erte anyqtaıtyn datchık jasap shyǵardy.
Qurylǵy júrek talmasy aýrýyn jyldam anyqtaýǵa arnalǵan. Ony aýrýhanada, jedel járdem jumysynda paıdalaný tıimdi bolmaq. Júıe eki kezeńde jumys isteıdi. Alǵashqy kezeńde ımmýnofermentti taldaý testi qan úlgisindegi cTnI aqýyzyn anyqtaıdy. Ekinshi kezeńde, sıgnaldy kúsheıtý fazasynda, hımııalyq reaksııa iske qosylady. Sodan keıin arnaıy portatıvti qurylǵy qandaǵy tús ózgerisin sýretke túsiredi. Neırojeli alynǵan keskinderdi 15 mınýt ishinde taldap beredi. Osylaısha, ınfarkt belgisin erte kezeńde-aq anyqtaýǵa bolady.