Uıyqtap jatqan adamdar bir-birimen túsinde tildesti.
Kalıfornııalyq REMspace startabynyń zertteýshileri arnaıy jabdyqtyń kómegimen eki adamdy tús arqyly baılanystyryp, tájirıbe jasap kórdi. Kompanııanyń málimetinshe, qurylǵy uıyqtap jatqan adamdardyń mı tolqyndaryndaǵy derekterdi baqylaǵan. Server qatysýshylardyń bireýi tereń uıqyǵa ketkenin anyqtaǵan kezde, ol kezdeısoq sóz týdyryp, ony qulaqqap arqyly ekinshi uıyqtap jatqan adamǵa jetkizgen. Qatysýshy sózdi túsinde qaıtalap aıtqan. Jaýaby serverge jazylyp saqtalǵan. REMspace ókilderi bul baılanysqa «tús kezindegi alǵashqy chat» dep at qoıǵan. Jalpy, bul – adam uıyqtap jatqanyn sanaly túrde túsinip, túsin basqara alatyn sananyń ózgergen kúıi. REMspace kompanııasy bul tehnologııa jasandy ıntellekt sııaqty úlken ózgeris ákelýi múmkin ári ol fızıologııalyq máselelerdi sheshe alady dep otyr.
Dırıjer robot
Adam men robot birlesip ótkizgen erekshe konsert ótti.
Drezdendik sımfonııalyq orkestr Dresden Sinfoniker óziniń 25 jyldyǵyna arnap erekshe konsert berdi. Eki bólimnen turatyn konserttiń birinshi bólimin adam basqarsa, ekinshi bólimin robot júrgizgen. Osylaısha, MAiRA roboty Vıland Reısmannyń «kreuzknoten» atty shyǵarmasynyń álemdik premerasyn basqarǵan. Bul týyndy dırıjer adamǵa qıyndaý, óıtkeni onda qıylysqan kúrdeli yrǵaqtar bar. Robotty Dresden Sinfoniker-diń kórkemdik jetekshisi Markýs Rındt eki jyl boıy ábden jattyqtyrǵan.
Jasandy ıntellekt jańalyǵy
Jasandy ıntellekt adammen jarysyp jańalyq ashatyn deńgeıge de jetip úlgerdi. Halyqaralyq ǵalymdar toby neırojeliniń kómegimen buryn belgisiz bolǵan 70 500 RNQ-vırýsyn anyqtady.
Endi qorshaǵan ortadaǵy genomdardyń úlgilerin alyp, jekelegen vırýstardy ósirýdiń qajeti joq. Zertteýshiler bundaı taldaýǵa LucaProt dep atalatyn jasandy ıntellekt modelin ázirlep shyqty. LucaProt modeline ESMFold arqyly aqýyzdardyń qurylymyn boljaý men sekvensııalaý derekteri qosylǵan. Ol zertteý barysynda genomdyq derekterdiń úlken kólemin taldaı otyryp, osy fermentti kodtaıtyn tizbekterdi anyqtap, vırýstardy tapty. Anyqtalǵan vırýstardyń kópshiligi burynnan belgili vırýs túrlerine uqsamaıtyn bolyp shyqty.