Mańǵystaý aýylynda ornalasqan saýda ortalyǵynda er adam aıaǵy aýyr áıelin óltirýge oqtalǵan, dep habarlaıdy Egemen.kz.
Mańǵystaý oblysynyń qylmystyq ister jónindegi mamandandyrylǵan aýdanaralyq soty K.-ǵa qatysty qylmystyq isti qarady.
Anyqtalǵandaı, azamat K. 2024 jylǵy 13 shildede saǵat 21:30 shamasynda alkogoldik masań kúıde bolyp, Munaıly aýdany, Mańǵystaý aýylynda ornalasqan «R» saýda ortalyǵynyń aldynda zańdy nekedegi zaıyby jábirlenýshi A-nyń júktilik jaǵdaıda ekenin bile tura, oǵan qasaqana kúsh kórsetken. Ony qazaǵa ushyratý oıymen, ózimen birge alyp júrgen as úı pyshaǵyn qoldanyp, jábirlenýshiniń denesiniń arqa, san jáne keýde tusynan birneshe ret soqqylar jasap, densaýlyǵyna aýyr zııan keltirgen.
Odan ári, sottalýshy K. óziniń qylmystyq is-áreketin toqtatpaı, alǵan aýyr dene jaraqattary saldarynan jerge qulaǵan jábirlenýshi A.-nyń dármensiz kúıde jatqanyna qaramastan, óziniń aıaqtarymen jábirlenýshiniń basynan birneshe ret teýip dene jaraqatyn salǵan.
Oqıǵa bolǵan jerge der kezinde kelgen polısııa qyzmetkerleri, sottalýshy K.-ny kúsh qoldaný (qolyn qaıyrý) arqyly ustaǵan.
Prokýror K.-ny taǵylǵan aıyp boıynsha kináli den tanyp, 15 jyl merzimge bas bostandyǵynan aıyrý jazasyn taǵaıyndaýdy talap etken. Al jábirlenýshi sottalýshy K.-ǵa jeńil jaza taǵaıyndaýdy ótingen. Sottalýshy K. jasaǵan áreketine shyn nıetimen ókinetinin málimdep, sottan jeńil jaza taǵaıyndaýdy suraǵan.
«Sottalýshynyń kinási, jábirlenýshiniń jáne kýálerdiń jaýaptarymen, sot saraptama qorytyndylarymen jáne ózge de is-qujattarymen dáleldendi. Sot K.-ǵa jaza taǵaıyndaý barysynda, onyń qylmystyq jaýapkershiligin jeńildetetin mán-jaı retinde shyn nıetpen ókinýin, al jazasyn aýyrlatatyn mán-jaılarǵa, qylmysty masań kúıde jasaǵanyn tanydy. 2 qazan 2024 jyly sot úkimimen: K.-ny QK-niń 24-baby 3-bóligimen, 99-babynyń 2-bóliginiń 4) tarmaǵymen kináli dep tanyp, oǵan 15 jyl merzimge bas bostandyǵynan aıyrý jazasy taǵaıyndaldy», delingen sot habarlamasynda.
Sot úkimi zańdy kúshine engen joq.