Ǵylym jáne joǵary bilim mınıstri Saıasat Nurbek Astanadaǵy Coventry University kampýsynyń stýdentterimen jáne professor-oqytýshylar quramymen kezdesti, dep habarlaıdy Egemen.kz.
Kezdesý barysynda Saıasat Nurbek Memleket basshysynyń Qazaqstannyń joǵary bilim jáne ǵylym júıesin damytý jáne nyǵaıtý maqsatynda júrgizip jatqan reformalary týraly aıtyp berdi. Onyń ishinde Ortalyq Azııada bilim berý habyn qurý josparlary týraly.
«Astanada Soventry University Kazakhstan ashylýy – tarıhı oqıǵa. Memleket basshysynyń tapsyrmasyn oryndaý maqsatynda iske qosylǵan zamanaýı jańa kampýs Astana bilim habynyń qalyptasýyna berik negiz qalaıtyny anyq. Jańadan ashylǵan Coventry University Kazakhstan oqý orny joǵary bilim men ǵylym júıesin damytýǵa, úzdik sheteldik oqytýshylar, tájirıbeli mamandar men daryndy stýdentterdi tartýǵa, elordada jańa jumys oryndaryn ashýǵa tyń serpin beretinine senimdimin. Astanadaǵy Coventry ýnıversıteti qazaqstandyq jáne sheteldik stýdentterge jergilikti jáne halyqaralyq eńbek naryǵynyń básekege qabiletti mamany bolý úshin brıtandyq dıplommen rastalǵan ozyq bilim men daǵdylardy alýdyń biregeı múmkindigin usynady», dedi mınıstr.
Vedomstvo basshysynyń kezdesýi «suraq-jaýap» formatyndaǵy dáriske ulasyp, kezdesýge qatysýshylar mınıstrmen dıalogqa belsendi qatysty.
Mınıstr jastarmen ózara túsinistik pen yntymaqtastyqty jaqsartý úshin stýdenttermen mundaı kezdesýler men dıalogtardyń qajet ekenin, beıresmı ortadaǵy qarym-qatynas ózara túsinistikke qol jetkizýge kómektesetinin atap ótti.