4-5 qarasha kúnderi Emmanıýel Makronnyń shaqyrýymen memleket basshysy Qasym-Jomart Toqaev Fransııaǵa barǵan edi. Osy saparda Fransııa prezıdenti Qasym-Jomart Toqaevtyń qurmetine oraı Elıseı saraıynda memlekettik qabyldaý ótkizgen bolatyn, dep jazady Egemen.kz.
Osy qabyldaý keshinde talantymen álemge esimi áıgili Dımash Qudaıbergen án shyrqaǵan. Prezıdent keńesshisi ári baspasóz hatshysy Berik Ýálı áleýmettik jelidegi paraqshasynda Dımash ánimen jınalǵan qaýymdy tánti etkenin jazdy.
«Dımashymyzdyń Parıj tórinde shyrqaǵan ekinshi áni ataqty «Daıdıdaý». Elıseı saraıynda qos Prezıdenttiń aldynda oryndaǵan eki ánin de memlekettik qabyldaýǵa jınalǵan jurtshylyq óte jyly qabyldady. Osy eki ánniń vıdeosyn joldaǵan fransýzdyq áriptesim Anastasııa Kolosımoǵa aıryqsha rahmetimdi aıtamyn», dedi Berik Ýálı.