Appaq kóıleginiń etegi jer syzyp, syrtqa shyqty. Bota kózin aýdaryp-tóńkerip, podezdiń aldyndaǵy baspaldaqtan túse bergende, keýdesine jasandy gúl shoǵyn taqqan jigit qolyn sozdy. Erteńgi kúıeýi bolsa kerek. Qasy-kózi qıylǵan qara tory qyz bultty kúni jarq etken kúndeı aýlada toptasqan jastardyń arasyn qyran-topan kúlkige bólep, bir-aq sátte kóńildendirip jiberdi. Shampan atylyp, bir rettik aq stakandarǵa quıyldy. Qara kostıýmdi kúıeý jigit qobaljýly sekildi. Kóńilinde alań bar.
Osydan eki-úsh aı buryn jazdyń qońyr salqyn túninde aýladaǵy dál osy oryndyqta taza aýamen tynystap otyrǵan edim. Kenet, podezdiń esigi shalqasynan ashylyp, temir jaqtaýǵa sharq etip tıgen. Alańsyz júrgen oıyn balalary da jalt qarasqan. Qalta telefonyn qulaqqa jabystyrǵan kúıi osy qyz ǵoı, áldekimmen daýystaı sóılesip shyqqan. Estigen qulaqta jazyq bar ma? Úıdiń búıirindegi qarańǵylaý tusqa baryp: «Toı jasamasań, meniń nómirimdi óshire sal» dedi. Kimmen sóılesip turǵanyn qaıdam, turmys qurýǵa nıetti qyz ekenin túsindim.
«...Kredıt alasyń ba, qaryz alasyń ba, sharýam joq. El qatarly aq kóılek kıip, baqytty bolýǵa quqym bar shyǵar. Bir toı jasaı almasań, nesine saqına salyp júrsiń?» degen zildi daýysynan-aq, tutqanyń arǵy jaǵyndaǵy jigitke, jigittiń ata-anasyna janym ashyǵan. Qazaqtyń yrdý-dyrdý toıy bastalmas burynǵy qudalyqta kıgizetin kóılek-kónsheginen-aq kıkiljiń shyǵyp, qanshama jastyń móp-móldir mahabbatyna syzat túser edi? Bul da sonyń kebi. Kúni keshe ǵana bir-birin aıym-kúnim dep júrgen jastar toı qamyna kelgende ıtis-tartys kúıge túse bastady. Erteńderi qalaı bolary, bir qudaıǵa aıan.
«Eı, sen tyńdap tursyń ba meni? Sóz salmas buryn oılanýyń kerek edi. Toı bolmasa, meni umyt. Uqtyń ba?» dedi de, telefonyn jamylyp shyqqan qara kúrtiniń qaltasyna súńgite saldy. Súńgite salyp, solqyldap jylady.
Kórshiniń kenje qyzynyń sol keshtegi sózi tipti aıdaladaǵy meniń qulaǵymda qalypty. Aqyry dittegenine jetken eken. Búgin qalanyń bir meıramhanasynda ulan-asyr toı. Bes saǵattyq toıǵa bola belsheden kredıtke kirgen ata-ana. Shyqqan shyǵynnan buryn ata-ananyń úmiti aqtalsa eken dep, ornymnan tura bergenimde, esiktiń aldyna «Lımýzın» kelip toqtap jatqan...