Jaqynda Shymkenttiń Qarataý aýdanyna qarasty 10 myń turǵyny bar Bozaryq turǵyn alabyna tabıǵı gaz berildi. Bul mańyzdy ınfraqurylymdyq jobanyń qurylysy byltyr bastalyp edi. Turǵyndardyń qýanyshyn bólisýge qala ákimi Ǵabıt Syzdyqbekov te arnaıy keldi.
Bozaryq shaǵyn aýdanynyń halqymen kezdesýde gazdandyrý isi kez kelgen shahardyń damýy men turǵyndardyń ómir sapasyn arttyrýǵa ólsheýsiz úles qosatynyn atap ótti. Sondaı-aq tabıǵı gazdyń qala ekologııasyn jaqsartýǵa tıgizer septigin de tilge tıek etti. Sonymen birge turǵyndarǵa «kógildir otyndy» paıdalaný kezinde qaýipsizdik erejelerin qatań saqtaýǵa qatysty ótinish te bildirdi.
Qazir gazdandyrýdyń ekinshi kezeńi aıasynda shamamen 700-deı abonent tabıǵı gazǵa qol jetkizip otyr. Jyl sońyna qaraı úshinshi kezeń aıaqtalǵannan keıin, qosymsha taǵy da 700-den astam otbasy tabıǵı gazben qamtamasyz etiledi. Sondaı-aq osy jyldyń aıaǵyna deıin shahardaǵy Yntymaq-2, Tassaı, Qaratóbe shaǵyn aýdandaryn da kógildir otynmen qamtamasyz etý josparlanyp otyr. Osy rette gaz jelisine qosylýdy jyldamdatý úshin turǵyndar «QazaqGaz Aimaq» AQ-ǵa ótinish bildirip, qujattardy tapsyrýy qajet.
Qala ákimi jýyrda ǵana 60 myńnan asa halqy bar Qaınarbulaq turǵyn alabyn gaz qubyry jelisine qosýǵa arnalǵan saltanatty is-sharaǵa da qatysqan edi. Aıta ketken jón, atalǵan alaptyń halqy osyǵan deıin kúndelikti turmysta suıytylǵan gazdy qoldanyp kelgen. Bul eldi mekende gaz qubyrynyń qurylysy 2022 jyly bastalǵan. Shahar basshysy halyqtyń kommýnaldyq qyzmetke baılanysty qajettiligin der kezinde óteý úshin jaýapty sala mamandaryna gaz qubyryn kestedegi merzimdi kútpeı erte kezden bastap paıdalanýǵa bere berý týraly tapsyrma júktegen bolatyn.
Bul oraıda atalǵan eldi meken abonentteriniń 60 paıyzy «kógildir otynǵa» qol jetkizdi, al 40 paıyzy bıyl qarasha aıynyń sońyna deıin qosylady degen jospar bar. Qaınarbulaqtyq turǵyndary qazirden bastap tabıǵı gaz qubyryn úılerine tartýǵa ótinish bildire alady.
Jyl sońyna deıin joǵaryda atalǵan eldi mekenderden bólek, Kóktóbe shaǵyn aýdany turǵyndaryn da «kógildir otynmen» qamtamasyz etý josparlanyp otyr. Keleshekte megapolıstiń barlyq shaǵyn aýdany tabıǵı gazben qamtylady.
Jalpy, respýblıkada eldi mekenderdi gazdandyrý jumysy qarqyndy júrip jatyr. 2024 jyldyń qorytyndysy boıynsha eldegi aýyl-qalalardy gazdandyrý deńgeıin 61,8 paıyzǵa jetkizý maqsaty qoıylǵan. Maqsat oryndalsa, 369 myńnan asa adam «kógildir otyn» ıgiligin kóredi nemese 140 eldi meken gazben qamtylady.