Memleket basshysy Qasym-Jomart Toqaev Mańǵystaý oblysyndaǵy balalardyń jappaı astan ýlanýyna qatysty pikir bildirdi, dep habarlaıdy Egemen.kz.
Memleket basshysy forýmda oraıly sátti paıdalana otyryp, kún tártibindegi ózekti máselelerge qatysty oıyn ortaǵa saldy. Jańa oqý jyly bastalǵan sátten elimizde bilim júıesine baılanysty máseleler jıi kóteriledi. Bilim salasynda eleýsiz qaldyratyn másele bolmaıtynyn atap ótti.
Mektepterde bastaýysh synyp oqýshylary men az qamtylǵan otbasylardan shyqqan balalar memleket esebinen tegin ystyq tamaqpen qamtylady. Osy oraıda Prezıdent mektep ashanalaryndaǵy tamaqtyń sapasyna basa mán bergen jón ekenin tilge tıek etti.
«Jaqynda Mańǵystaý oblysynda balalar astan ýlandy. Bul oqıǵanyń qoǵamda qyzý talqylanýy oryndy. Mundaı jaǵdaılardyń qaıtalanýyna jol bermeý kerek. Sanıtarlyq-epıdemıologııalyq normalardyń saqtalýyn qatań baqylaý qajet. Biraq máseleniń máni tym tereńde jatyr. Oqýshylardy sapasy kúmándi ári arzan azyq-túlikpen tamaqtandyra almaımyz. Balalardy tamaqtandyrýdyń halyqaralyq standarttaryna umtylǵanymyz durys. Ashanadaǵy taǵamdar ósip kele jatqan aǵzany barlyq qajetti dárýmenmen qamtamasyz etýi kerek. Bul óskeleń urpaqtyń densaýlyǵyna tikeleı áser etedi», dedi Qasym-Jomart Toqaev.
Prezıdenttiń aıtýynsha, quzyrly mekemeler mektep ashanalaryndaǵy azyq-túliktiń sapasyn kóterý máselesimen muqııat aınalysýy qajet. Mektepterde durys tamaqtandyrý mádenıetin qalyptastyrý úshin agroónerkásip kesheni bilim berý oryndarynyń seriktesine aınalǵany jón.