Otyrys barysynda senatorlar «Qazaqstan Respýblıkasynyń Ulttyq qorynan 2025-2027 jyldarǵa arnalǵan kepildendirilgen transfert týraly» zańdy qarap, maquldady.
Qujat normalaryna sáıkes memlekettik mindettemelerdi oryndaý boıynsha shyǵystardy qamtamasyz etý úshin Ulttyq qordan 2025, 2026 jáne 2027 jyldarǵa arnalǵan respýblıkalyq bıýdjetke kepildendirilgen transferttiń mólsheri 2 trln teńgeni quraıdy. Zańnyń qabyldanýy bıýdjettiń teńgerimdiligin qamtamasyz etýge jáne Ulttyq qordyń turaqtandyrý fýnksııasyn iske asyrýǵa múmkindik beredi.
Sonymen qatar depýtattar «2025 – 2027 jyldarǵa arnalǵan respýblıkalyq bıýdjet týraly» zańdy da qarady. Bıýdjettiń basym mindeti memlekettiń áleýmettik mindettemelerin oryndaý jáne el Prezıdentiniń tapsyrmalaryn iske asyrý bolyp qala beredi.
Máselen, aldaǵy úsh jylǵa arnalǵan respýblıkalyq bıýdjettiń parametrleri bıýdjettik qaǵıdalardyń saqtalýyn jáne bıýdjet shyǵystarynyń áleýmettik-ekonomıkalyq damýdyń basym baǵyttaryna shoǵyrlanýyn eskere otyryp aıqyndalǵan.
«Bıýdjet shyǵystarynyń birinshi kezektegi baǵyttary memlekettik áleýmettik mindettemelerdi tolyq kólemde oryndaý, ǵylymdy, bilim berýdi, medısınany qoldaýdy kúsheıtý arqyly adamı kapıtaldy damytý bolyp qala beredi. Atap aıtqanda, respýblıkalyq bıýdjet shyǵystarynyń jalpy kólemi 2025 jyly 25 750 mlrd teńge, 2026 jyly 23 168 mlrd teńge jáne 2027 jyly 24 566 mlrd teńge somasynda josparlanyp otyr. Qarajat qazirgi jaǵdaılarǵa beıimdele otyryp, ekonomıkalyq úlgi qalyptastyrýǵa, sondaı-aq memlekettik qarjynyń turaqtylyǵyn qamtamasyz etýge jáne halyqtyń tabysyn arttyrý úshin jaǵdaı jasaý arqyly azamattardyń ál-aýqatyn jaqsartýǵa baǵyttalady», delingen habarlamada.
Senatorlar konseptýaldy túrde respýblıkalyq bıýdjetti qoldady, degenmen, ony qaraý barysynda birqatar ózgerister engizdi. Naqty aıtqanda, depýtattar kelesi jylǵa qosymsha 60 mlrd teńge bólýdi usyndy. Bul qarajat óńirlik damýǵa, sýmen jabdyqtaý jáne sý burý problemalaryn sheshýge, «Aýyl – el besigi» baǵdarlamasyn iske asyrýǵa, sondaı-aq basqa da baǵyttarǵa arnalǵan. Osyǵan baılanysty usynylǵan túzetýlermen zańdy Májiliske qaıtarý týraly sheshim qabyldandy.