Qytaıdyń Chýnsın qalasynda mánerlep syrǵanaýdan halyqaralyq týrnır aıaqtaldy. Elimizdiń eń úzdik sportshysy Mıhaıl Shaıdorov atalǵan jarysta tabysty óner kórsetti.
Qysqa baǵdarlamany jerlesimiz ekinshi orynmen qorytyndylaǵan edi. Kelesi kúni de Shaıdorov shabysynan jańylǵan joq. Erkin baǵdarlamany sátti oryndap shyqqan ol kórermen qoshemetine bólendi. Jarys qorytyndysynda 276,17 upaı jıǵan Mıhaıl kúmis medaldy moınyna ildi. Dúbirli doda Japonııanyń juldyzy, komandalyq álem chempıonatynda úshinshi orynǵa turaqtaǵan Sıýn Satonyń jeńisimen aıaqtaldy. Ol 278,48 upaı oljalady. Qola medaldy tegi qytaılyq, biraq Fransııada dúnıege kelgen álem chempıonatynyń qola júldegeri, Eýropanyń eki dúrkin chempıony Adam Sıao Hım Fa jeńip aldy. Onyń kórsetkishi – 252,53 upaı.
Keıingi kezderi Mıhaıl Shaıdorovtyń óneri kópshiliktiń kóńilinen shyǵyp júr. 20 jastaǵy Almaty qalasynyń týmasy osyǵan deıin jastar arasyndaǵy álem birinshiligi (2023) men «Golden Spin of Zagreb» (2023) týrnıriniń kúmis júldegeri, «Qytaı kýboginiń» (2023) qola júldegeri, «Challenge Cup» (2024) dodasynyń jeńimpazy atandy. Qazirgi kezde Olımpıada, Eýropa chempıony, maıtalman maman Alekseı Ýrmanovtyń qol astynda jattyǵyp júrgen Shaıdorov ISU-dyń dúnıejúzilik reıtınginde 12-orynda nyq tur.