Májilis «2024-2026 jyldarǵa arnalǵan respýblıkalyq bıýdjet týraly» zańǵa engiziletin túzetýlerdi qabyldady, dep habarlaıdy Egemen.kz Májilistiń baspasóz qyzmetine silteme jasap.
Zań jobasy respýblıkalyq bıýdjet parametrleriniń ózgerýine baılanysty ázirlengen. Qazaqstan Respýblıkasynyń 2024-2028 jyldarǵa arnalǵan áleýmettik-ekonomıkalyq damý boljamyna bıýdjet jáne Ulttyq qordyń 2024 jylǵa arnalǵan parametrleriniń boljamyn naqtylaý maqsatymen ózgerister engizilgen.
«Transfertter túspesten 2024 jylǵa arnalǵan respýblıkalyq bıýdjet kiristeriniń naqtylanǵan boljamy 14,1 trln teńge somasynda aıqyndaldy, bul bekitilgen boljamdy jospardan 2 trln teńgege az. Atap aıtqanda, salyq túsimderiniń 3 trıllıon teńgege tómendeýi, salyqtyq emes túsimderdiń 1 trıllıon teńgege, al negizgi kapıtaldy satýdan túsetin túsimderdiń 3,3 mıllıard teńgege artýy boljanyp otyr», delingen habarlamada.
Nátıjesinde Ulttyq qordan túsetin nysanaly transfert 2 trln teńgege ulǵaıyp, 3,6 trln teńge alý josparlanǵan. Qarajat óńirlik ósý deńgeıin ustap turýǵa jáne JIО́ ósý qarqynynyń tómendeý táýekelderi jaǵdaıynda áleýmettik mańyzy bar jáne strategııalyq mańyzdy ınfraqurylymdyq jobalardy qarjylandyrýǵa baǵyttalatyn bolady.