QR Premer-mınıstriniń tehnıkalyq jáne kásibı bilim berý júıesindegi stýdentterge qoldaý kórsetý jáne salany damytý úshin elimizde Ulttyq quzyrettilik ortalyǵyn qurý týraly tapsyrmasyn júzege asyrý aıasynda Oqý-aǵartý mınıstri Ǵanı Beısembaev Qytaı Halyq Respýblıkasyna jumys saparymen bardy. Mınıstr tehnıkalyq jáne kásiptik bilim berý salasyndaǵy aldyńǵy qatarly tájirıbelermen tanysyp, qytaılyq áriptesterimen birqatar kezdesýler ótkizdi, dep habarlaıdy Egemen.kz Oqý-aǵartý mınıstrliginiń baspasóz qyzmetine silteme jasap.
Mınıstrdiń mamandardy daıarlaıtyn biregeı oqý ortalyǵy – Lý Ban sheberhanasyna barýy jumys sapary barysyndaǵy mańyzdy is-sharalardyń biri boldy. Keshen stýdentterdiń jańa óndiristik jáne sıfrlyq tehnologııalardy, ınjenerlik jobalaýdy meńgerýine múmkindik beretin zamanaýı qural-jabdyqtarmen jáne oqý materıaldarymen jaraqtandyrylǵan. Bul tájirıbeni Qazaqstanda ulttyq quzyrettilik ortalyǵyn ashý kezinde qoldaný josparlanǵan, ol tehnıkalyq jáne kásiptik júıe stýdentteri úshin jańa múmkindikterge jol ashady.
Tıanszınde mınıstr Qytaıdyń jetekshi kolledjderiniń ókilderimen birneshe kelissóz ótkizdi. Taraptar ekijaqty yntymaqtastyqty damytý jáne jumysshy mamandardy daıarlaýda tájirıbe almasý máselelerin talqylady.
Ǵanı Beısembaev sondaı-aq 48 memlekettiń salalyq mınıstrleriniń qatysýymen ótken Dúnıejúzilik kásiptik jáne tehnıkalyq bilim berýdi damytý jónindegi konferensııaǵa qatysty. Otyrystyń plenarlyq sessııasynda sóz sóılegen mınıstr Qazaqstanda kásiptik-tehnıkalyq bilim berý júıesin damytýdyń mańyzdylyǵyna toqtalyp ótti.
«Qazaqstan Prezıdenti jarııalaǵan Jumysshy mamandyqtar jylynyń aıasynda tehnıkalyq jáne kásiptik bilim berý júıesin transformasııalaý júrgizilip jatyr. Ásirese, kúrdeli óndiristik máselelerdi sheshý úshin qajet emosıonaldyq ıntellekt jáne ınjenerlik oılaý sııaqty jumsaq daǵdylardy damytýǵa erekshe nazar aýdarylyp otyr. Halyqaralyq tájirıbeni eskere otyryp, zańnamalyq normalardy jetildirýge jáne kolledjderdi basqarý júıesin kúsheıtýge basymdyq beriledi. Qazaqstan óz stýdentteriniń básekege qabilettiligin arttyrý úshin maman daıarlaý úrdisine álemdik kásibı qaýymdastyq pen aldyńǵy qatarly bilim berý tehnologııalaryn engizýge umtylyp jatyr», dedi Ǵanı Beısembaev.Sondaı-aq mınıstr QHR-nyń bilim mınıstri Hýaı Szınpenmen ekijaqty kezdesý ótkizdi. Taraptar bilim salasynda Qazaqstan-Qytaı yntymaqtastyǵyn arttyrý, tehnıkalyq jáne kásiptik bilim berýde eki eldiń tájirıbe almasýy máselesin talqylady.