Kókshetaýda Qopa kóli boıyndaǵy jańa jol boıynda kólik qozǵalysy jáne Zastansıonnyı shaǵyn aýdanyndaǵy kópir ashyldy, dep habarlaıdy Egemen.kz.
Aqmola oblysy ákimdiginiń málimetinshe, uzyndyǵy 1,7 km Jaǵalaý kóshesiniń jańa ýchaskesi Kenesary kóshesin Qan ortalyǵyna burylyspen jalǵaıdy. Búgingi tańda ekijaqty jaryqtandyrý ornatylyp, trotýarlar men velosıped joldary, baǵdarshamdar men sý burý naýalary jabdyqtalǵan.
Joba oblys ákimdigi men «Qazsınk» AQ arasyndaǵy memlekettik-jekemenshik áriptestik aıasynda júzege asyrylyp jatyr. Jol magıstrali qalanyń eki aýdany arasyndaǵy qashyqtyqty edáýir qysqartady jáne oblys ortalyǵynyń negizgi kóshelerindegi trafıkti jeńildetedi. Aıta keteıik, jańa jol nebári úsh aıda salynǵan.
«Joldyń jańa ýchaskesi qaýipsizdik, yńǵaılylyq deńgeıin arttyrady jáne týrıstik áleýetti damytýǵa yntalandyrady», dedi oblys ákimi.
Sondaı-aq Marat Ahmetjanov Ýálıhanov kóshesinen Zastansıonnyı shaǵyn aýdanyna qaraı temir jol arqyly ótetin jol ótpesine deıingi joldy rekonstrýksııalaýdyń aıaqtalýyn tekserdi.
Merdiger uıym sý burý naýalaryn tóseý, trotýarlardy, jaryqtandyrý tirekterin, baǵdarshamdar men jaıaý júrginshiler qorshaýlaryn ornatý, sondaı-aq ÁJ-110 kV elektr berý jelilerin tartý boıynsha jumystar júrgizgen.